Read Sangir MAZMURẸ̌ 23 Bible Online

MAZMURẸ̌ 23 - Sangir bible

MAZMURẸ̌ 23

¹Mazmuri Daud. MAWU e tạbidạu sěngkatau měndal᷊ukadẹ̌ si siạ, iạ e tawe kawusang.

² I Sie e naparal᷊okang iạ, su wimbaengu pěpạ kụ ido. I Sie měnata si siạ mẹ̌timona akẹ matanạ.

³I Sie něngonggọu kuatẹ̌ buhu si siạ, dingangu něngahạ u iạ su ral᷊eng kahěngang, kerẹewe seng niriandi-Ne.

⁴Maningbe iạ lụliu wal᷊ane marěndung, iạ e tawe matakụu hombang, u i Kau e rụděndingang siạ. I Kau e mạněntanudẹ̌ siạ kere sěngkatau měndal᷊ukadẹ̌ mạněntanudẹ̌ dombane piạ těkinge ringangu pal᷊o-pal᷊one.

⁵I Kau e něndiahing sal᷊iwang baugu iạ su těngom matan dokạku. I Kau e naněnsomahẹ̌ si siạ kere sake lẹ̌adateng. I Kau e nẹ̌siliwirẹ̌u inumang matemang mẹ̌dẹ̌dal᷊embo si siạ e.

⁶Iạ e masingkạ u i Kau e mapia si siạ, dingangu hanesẹ̌ kụkěndagu iạ. Tangu iạ e wotonge matanạ su Wal᷊e-Nu, kanandung biahẹ̌ku.