Read Sangir MAZMURẸ̌ 25 Bible Online

MAZMURẸ̌ 25 - Sangir bible

MAZMURẸ̌ 25

¹Mazmuri Daud. Kai si Kau, MAWU, takụ awikang kakal᷊iomanengku,

²o Ruataku, iạ e mangimang si Kau! Abe wala iạ ipakamea, dingangu ipẹ̌giong manga rokạku.

³Taumata kụ tumal᷊ikudẹ̌ si Kau e sarung ipakamea, arawe i saing kụ mạngimang si Kau e tawe sarung ipakanawo naunge.

⁴Todẹko kapulu-Nu e si siạ MAWU, lahẹko kai apa hinong koatengku.

⁵Těntiroiko ringangu ahạko iạ mẹ̌deạu mẹ̌biahẹ̌ tumuhụ kapulu-Nu, u kai i Kau e Ruata kụ něngambang siạ, iạ e sidutu mělẹ̌harapẹ̌ si Kau.

⁶Pẹ̌tahěndungko kapia ringangu kakěndagʼU, o MAWU, kụ nạung nitodẹʼU rokeng kal᷊imona.

⁷Ampungeko rosa ringangu pẹ̌sasal᷊aku tempong mangudạ, tahěndungeko iạ tuhụ kakěndagẹ̌ dingangu kapia-Nu.

⁸U MAWU e mapia ringangu adilẹ̌, i Sie něnẹ̌bọu ral᷊eng su taumata kụ mạpal᷊idẹ̌.

⁹MAWU e něngahạ taumata naunge kụ masanạ, dingangu mạněntirong kapulu-Ne si sire.

¹⁰Taumata kụ matuhụ su riandi ringangu tita-Ne, ikẹ̌koạʼE ringangu kakěndagẹ̌ ore lai satia.

¹¹MAWU, ampungeko iạ e matuhụewe kere su riandi-Nu, u kai masaria pẹ̌sasal᷊aku.

¹²MAWU e mạněntiro su taumata kụ mal᷊aagama dal᷊eng kụ harusẹ̌ dal᷊engang i sire.

¹³I sire sarung tatapẹ̌ mẹ̌biahẹ̌ masukụ, anạ pulung i sire sarung kapusakatengu ěntana.

¹⁴MAWU e ute kai hapịu taumata kụ mal᷊aagama, i Sie mělẹ̌lahẹu timona-Ne si sire.

¹⁵Mataku e tatapẹ̌ sarang anung MAWU e, batụu kai i Sie něngambang siạ bọu silakạ.

¹⁶Tinganeko iạ, dingangu kěndagẹ̌kong iạ e, batụu iạ e kai tụtal᷊iahu ringangu masunsara.

¹⁷Kasasusan naungku e mangkeng kạkatambane liwirẹ̌ko iạ e wọu kasasěsẹku.

¹⁸Tinganeko sunsara ringangu kasigěsạku, dingangu ampungeko kal᷊awọu rosaku.

¹⁹Kakěllaiko kai apạ e kal᷊awọe rokạku; i sire sidutu mẹ̌bẹ̌binsịu iạ.

²⁰Diagate wue ringangu ambange wue iạ, tadeạu iạ e tawe makahombang kamamea, watụ u iạ e mẹ̌tẹ̌těngkal᷊indung si Kau e.

²¹Karimạko kapia ringangu katul᷊idẹ̌ e mạhundingangu iạ, u iạ e mělẹ̌harapẹ̌ si Kau.

²²O Mawu Ruata, liwirẹ̌ko umatʼU e wọu kal᷊awọu kasasěsẹ e.