Read Sangir MAZMURẸ̌ 26 Bible Online

MAZMURẸ̌ 26 - Sangir bible

MAZMURẸ̌ 26

¹Mazmuri Daud. Onggotengkong kạadilẹ̌ e iạ, MAWU, u iạ e mẹ̌bẹ̌biahẹ̌be ringangu naungku wurẹ̌si. Iạ e mělẹ̌harapẹ̌ su MAWU, ringangu tawẹ apawe ghěnggange sarang kạdidị.

²Titike wue iạ e, MAWU, wanikate wue iạ e, parikẹ̌sai wue ilẹ̌ěnningku e ringangu tiněnnaku.

³Iạ e sěntiniạ mẹ̌tẹ̌tahěndung kakěndagʼU, ringangu tatapẹ̌be satia si Kau.[18]

⁴Iạ e madiri mẹ̌komol᷊ẹ̌ dingangu tahapěngakal᷊ẹ̌, arau mẹ̌dal᷊ahapịu taumata tahakontiang.

⁵Iạ e mạběnsingu komol᷊angu taumata kụ mẹ̌koạ dal᷊akisẹ̌, ghal᷊ipohon taumata ral᷊akisẹ̌ e takụ ipẹ̌tẹ̌teghang.

⁶Limaku takụ uhaseng, tatialan tawẹ sal᷊aku, ringangu rụdal᷊eng mělẹ̌likụ pananěmbaěngʼU MAWU,

⁷kapẹ̌kẹ̌kantarịeng lagun tatarimakasẹ, dingangu mělẹ̌habaru kakanoạʼU makạdal᷊inaụ.

⁸Iạ e mẹ̌kẹ̌karalọu Wal᷊e-Nu e MAWU, tampạ katatanakengʼU kụ napenẹu kawawantugẹ̌.

⁹Kumbahang měmate si siạ dingangu taumata waradosa, arau měnawụ niawaku ringangu taumata kụ mapạtědọu raha e.

¹⁰I sire e turusẹ̌-turusẹ̌ mẹ̌kẹ̌koạ dal᷊akisẹ̌, dingangu měngkate hanesẹ̌ měnẹ̌narimạ sasorokẹ̌.

¹¹Arawe iạ e mẹ̌bẹ̌biahẹ̌ su katatatulusu naung, kụ tal᷊ěntuke wue ringangu liwirẹ̌ bue iạ e.

¹²Kụ tawe mẹ̌kapura wue iạ e wọu kal᷊awọu silakạ, kụ iạ e makapẹ̌dalo MAWU su ral᷊ungu komol᷊angu umatʼE.