Read Sangir MAZMURẸ̌ 30 Bible Online

MAZMURẸ̌ 30 - Sangir bible

MAZMURẸ̌ 30

¹Mazmuri Daud. Kakantarị baugu pěnggaghuatingu Wal᷊en Mawu Ruata.

²Iạ mẹ̌dalo si Kau, o MAWU, u i Kau e seng něngambang si siạ, dingangu tawe namalan dokạku e limiagu iạ e.

³MAWU Ruataku, iạ e kụkahiorọ si Kau makịtul᷊ung, kụ i Kau e napakaul᷊eng iạ.

⁴I Kau e něliwiru iạ e wọu papate, ringangu napẹ̌biahu iạ e wọu tal᷊oarang kal᷊awọu taumata nate.

⁵Pẹ̌kantarịkong kal᷊awọu raralo waugu MAWU, ei manga umatʼE kụ satia, ringangu pakitarimakasẹko su Limembong KasusiangʼE.

⁶U tạ kararěnane MAWU e lumangehẹ̌, kapia-Ne e kai tumanung kanandum biahẹ̌. Su tempong hěbi e iạ e kumiạ, arawe wěmbanaho e kai mẹ̌bẹ̌bawa ral᷊uasẹ̌.

⁷Su tempong makapěndang mal᷊enehẹ̌ e, iạ mẹ̌bera. ”Iạ e tawe i kawatạ!”

⁸U i Kau e mapia naungu si siạ, MAWU! Pinakariadi-Nu iạ e kere wul᷊ude makuatẹ̌. Arawe wọu ene i Kau e kawe nẹ̌kěmbuni wọu iạ e, kụ iạ kawe natakụ.

⁹Iạ e kụkahiorọ si Kau MAWU, iạ e kụkakindoạ su MAWU.

¹⁰”Apawu gunane si Kau mạengu iạ e mate ringangu tanaẹ sarang lohangu kubul᷊ẹ̌ e? Botonge taumata nate mẹ̌dalo si Kau ringangu měhabaru satianʼU tangu?

¹¹Pẹ̌daringihẹ̌ko MAWU, ringangu kěndagẹ̌beng iạ. O MAWU tul᷊ung bue iạ!”

¹²Sasangịku e niwal᷊uiku nakoạ sal᷊ain dal᷊uasẹ̌, nial᷊ạʼU e susan naungku ringangu pinẹ̌papinunụʼU e iạ dingangu ral᷊uasẹ̌.

¹³Tangu iạ e mạdiri mẹ̌těngkarěmasu watangeng; takụ kantarikang daralo si Kau e, o Mawu Ruataku, ringangu makitarimakasẹ si Kau sarang marěngụ-děngụ!