Read Sangir MAZMURẸ̌ 31 Bible Online

MAZMURẸ̌ 31 - Sangir bible

MAZMURẸ̌ 31

¹Baugu měngangahạ kantarị. Mazmuri Daud.

²Iạ e mẹ̌těngkal᷊indung si Kau MAWU, abe wala naungku e pakanawo. Ambangeko iạ e waugu kạadilʼU

³daringihe wue iạ dingangu liwirẹ̌ bue iạ e pakarol᷊ạ. Kakoạko waugu iạ e wukidẹ̌ batu tampạku mẹ̌těngkal᷊indung, kere těndạ matoghasẹ̌, kụ sene iạ maambang.

⁴Kụ i Kau e mẹ̌sul᷊ungu wukidẹ̌ batu ringangu těndạ kụ matoghasẹ̌ baugu iạ! Ahạko iạ e tuhụewe su riandi-Nu.

⁵Pěllọko iạ e wọu sedẹ kụ nitaing baugu iạ e, u i Kau e tampạku mẹ̌těngkal᷊indung.

⁶ Su ral᷊ungu l᷊ima-Nu e takụ isarakang batangengku; i Kau e něliwiru iạ e, o MAWU, Ruata kụ masatia.

⁷Taumata kụ měnẹ̌němba mahang duata e ipẹ̌bẹ̌binsịu; arawe iạ e mangimang su MAWU.

⁸Iạ e sarung mal᷊uasẹ̌ dingangu mal᷊iagẹ̌ u i Kau e těbewe kụkěndagu iạ. I Kau e nakasilo sigěsạku ringangu tụtatingang susaku.

⁹I Kau e tawe napakawalang iạ nitawengu rokạ, kaiso kawe nakakariading iạ e wotonge rumal᷊eng tạ konsange.

¹⁰Kěndagẹ̌kong iạ, MAWU, u iạ e su ral᷊ungu susa naung, mataku e rimukung ual᷊ingu sasangị, himukudẹ̌ku ringangu wadangku e tụtal᷊iahu.

¹¹Pẹ̌bawiahẹ̌ku e nasue su ral᷊ungu sigěsạ, kal᷊awọu taungku napaghohẹ̌ su ral᷊ungu ral᷊umpasiang. Kuatẹ̌ku e kimoho ual᷊ing karal᷊akisẹ̌ku, saral᷊aing manga ruhiku e mẹ̌papuhẹ̌.

¹²Iạ e nakoạ dal᷊ěgeěngu kal᷊awọu manga rokạku, saral᷊aing baugu manga l᷊ampungku. Patikụ apang kiral᷊aku e lụhěkosẹ̌ mạengu makasilo si siạ, i sire tụtal᷊ang kereu mẹ̌sombangu iạ su ral᷊eng.

¹³Iạ nikawul᷊enang mẹ̌sul᷊ungu tau nate, ringangu nakoạ kere apal᷊iwụ kụ nirěmmẹ.

¹⁴Su apan tampạ piạ hombang makạtatakụ; i kẹ̌karingihẹ̌ku niusu rokạku. I sire sěngkanaung dumokạ si siạ, dingangu mẹ̌kẹ̌karaki mapulu měmate si siạ.

¹⁵Kaiso iạ e mělẹ̌harapẹ̌ si Kau, o MAWU, u kai i Kau e Ruataku.

¹⁶I Kau sidutu mělẹ̌hiking si siạ; ambangeko iạ e wọu kal᷊awọu rokạku, ringangu wọu kal᷊awọu taumata kụ měnẹ̌nahusu si siạ.

¹⁷Karimạko i Kau reng makatarimạu ěllangu e; ambangeko iạ ual᷊ingu kakěndagʼU.

¹⁸Abe wala iạ pakamea, MAWU, u iạ e mẹ̌kẹ̌kui si Kau. Balạe kere taumata ral᷊akisẹ̌ e pakamea, kụ dingangu marěmasẹ̌ e lumintụ sarang banuang tau nate.

¹⁹Sěnsingko mohongu apan tahakontiang kụ dingangu oboti sire měheghesẹ̌ taumata matul᷊idẹ̌.

²⁰Apạ e mạhěmpal᷊iu kapia-Nu kụ nisadia-Nu waugu taumata kụ maagimatẹ̌ e! Apan taumata e makạsilo kapia kụ kẹ̌koatengʼU, baugi sire kụ mẹ̌tẹ̌těngkal᷊indung si Kau.

²¹I Kau měmẹ̌munin sire kụ su ěllungʼU e wọu tondol᷊ikụu taumata ral᷊akisẹ̌; lẹ̌lukarengʼU e i sire su ral᷊ungu pananirungʼU wọu pěngangěnsilu rokạ.

²²Karaloko MAWU e! Kụ apạ e makạdal᷊inaụ kakěndagʼE si siạ, su tempong iạ nital᷊iwungang dingangu nialoěng.

²³Su ral᷊ungu kawawingọku e iạ mạnoke u MAWU e seng něnděmmẹ u iạ bọu těngo-Ne. Arawe i Sie seng dimaringihẹ̌ kakindoạku su tempong iạ mẹ̌kẹ̌kui si Sie.

²⁴Tal᷊ěntụkon MAWU, ei patikụ umatʼE, MAWU e mạnirung taumata kụ satia. Arawe taumata maobotẹ̌ e i hukungʼE tawẹ dudatone lawọ.

²⁵Apakakuatẹ̌ko ringangu apakatoghasẹ̌ko naungu, e i kamene apang mělẹ̌harapẹ̌ su MAWU!