Read Sangir MAZMURẸ̌ 32 Bible Online

MAZMURẸ̌ 32 - Sangir bible

MAZMURẸ̌ 32

¹ Mazmuri Daud. Kakantarị těntiro. Kariangkamang taumata kụ dosane niampungang, dingangu pẹ̌sasal᷊ane nipakal᷊iu.

²Kariangkamang taumata kụ karal᷊akise tawe nirekengu MAWU, ringangu wẹ̌gawe měngakal᷊ẹ̌.

³Karěngụu iạ deng tawe měngaku rosaku, iạ e tụtal᷊iahu ual᷊ingu měnẹ̌nukung kanandung ěllo.

⁴Ěllo hěbi i Kau e měnẹ̌nědạ si siạ, MAWU, katoghasẹ̌ku e nasue nisěsụu tětị u matangěllo.

⁵ Bọu e iạ e měngaku rosaku si Kau, pesasal᷊aku e tawẹ apa kụ takụ niwuni. Iạ e němutusu měngakung ene e si Kau, ringangu i Kau e mangampung kal᷊awọu rosaku.

⁶Ual᷊ingu ene apan taumata kụ maagimatẹ̌ e měngkai pẹ̌kal᷊iomaneng su tempong kahombangengu kasasěsẹ, hakịu kamagengu kaěndukangu lěbang susa e, i sie tawẹ nenenge.

⁷I Kau e tampạu pẹ̌kakěmbuniangku, niliwiru iạ e wọu kasasigěsạ. Tangu iạ e mal᷊ua-l᷊uasẹ̌, u i Kau e seng něngambang si siạ.

⁸Angkuěngʼu MAWU e, ”Iạ e sarung měnodẹ̌u ral᷊eng kụ hinon dal᷊engangu, i kau e sarung Takụ ahakeng dingangu Takụ sasaěng.

⁹Kumbahangbe kere kawal᷊o kụ tawẹ akal᷊e, kụ hinong ul᷊ingangu kakěting dingangu tal᷊i tadeạu tumuhụ.”

¹⁰Taumata warạdosa e kahombangengu sunsara mal᷊awọ; arawe taumata kụ mělẹ̌harapẹ̌ su MAWU e těbewe tẹ̌těntanurangu kakěndagʼE.

¹¹Ei taumata kụ maagimatẹ̌ e, pahul᷊uasẹ̌ko ringangu pahul᷊iagẹ̌ko batụu apang seng kinoạu MAWU e. Pahul᷊uase pakapia, ei kěbị taumata apan naunge tulusẹ̌ e.