Read Sangir MAZMURẸ̌ 33 Bible Online

MAZMURẸ̌ 33 - Sangir bible

MAZMURẸ̌ 33

¹Ei kal᷊awọu taumata mal᷊aagimatẹ̌ e, pěmpẹ̌giọen dal᷊uasẹ̌ baugu apan seng kinoạu MAWU; sembeng hinone taumata matul᷊idẹ̌ e měmpẹ̌dẹ̌dalo.

²Pakitarimakasẹko su MAWU e ringangu kěcapi, pěmpẹ̌kantarịko waugi Sie e pakiwawa su musikẹ̌.

³Pěmpẹ̌kantarịkon lagu wuhu e waugu MAWU, nalangengkong kěcapi e pakapia ringangu pěmpẹ̌giọen dal᷊uasẹ̌!

⁴Patikụ hengetangu MAWU e kapangimangeng; i Sie e satia su ral᷊ungu patikụ kakanoạʼE.

⁵I Sie e puluang su katul᷊idẹ̌ dingangu kạadilẹ̌ e; kasěllahu dunia e napenẹu kakěndagʼE.

⁶MAWU e něhengetang, tangú langị e nariadi; matangěllo, wul᷊ang dingangu wituing e nipakariading hengetangʼE.

⁷Kal᷊awọu sasịe nitampungʼE su tampạ sěmbaụ, laudẹ̌ mal᷊oange niarangʼE su ral᷊ungu lahěpinge.

⁸Balạete kạguwạu dunia e mạtakụ u MAWU ringangu tumatanạu dunia e měngadatẹ̌ si Sie.

⁹U i Sie kai něhengetang, mase patikụ e niriadi-Ne; i Sie nẹ̌parenta, tangu patikụ e nariadi.

¹⁰MAWU e namatal᷊ẹ̌ hingidu manga wansa, i Sie napakatal᷊ang karakin sire.

¹¹Arawe karakiʼm MAWU e tatapẹ̌ bue, hingidʼE matoghasẹ̌ kananduʼn tempo.

¹²Kariangkamang bansa kụ měngakung MAWU e kai Ruatane, kariangkamang umatẹ̌ kụ pinilenʼE nakoạ tataghuanengʼE!

¹³Bọu sorga e MAWU ěnaẹ tụtingang, dingangu i Sie makạsilo kal᷊awọu taumata.

¹⁴Bọu kal᷊aianengʼE MAWU e mạnitị patikụ apang mạtanạ su dunia.

¹⁵Seng i Sie e namitụ naung i sire, ringangu masingkạ u kal᷊awọu kakanoạ i sire.

¹⁶Datu e tawe nakawatạ ual᷊ingu kasarian sordadon sire, prajuritẹ̌ e tawe masal᷊amatẹ̌ ual᷊ingu katoghasi sire.

¹⁷Kawal᷊oe tawe kapangumbalaěng baugu makauntu, kuate mạngělembo e tawe makasal᷊amatẹ̌.

¹⁸MAWU e mělẹ̌lukadẹ̌ taumata apang mal᷊aagama e kụ mělẹ̌harapẹ̌ kakěndagʼE.

¹⁹I Sie mapakạsal᷊amati sire wọu papate, ringangu mapẹ̌biahi sire su tempong karal᷊unusẹ̌ e.

²⁰Tangu i kitẹ e mělẹ̌harapẹ̌ su MAWU. Kụ seng i Sie e mẹ̌tatul᷊ung dingangu tumatatawang si kitẹ e.

²¹I kitẹ mạhul᷊uasẹ̌ e ual᷊ingu i Sie ringangu mạngimang su arengʼE kụ susi.

²²Karimạko i kami e těbewe i kẹ̌kěndagʼU, MAWU, u i kami e mẹ̌lẹ̌harapẹ̌ si Kau.