Read Sangir MAZMURẸ̌ 34 Bible Online

MAZMURẸ̌ 34 - Sangir bible

MAZMURẸ̌ 34

¹ Mazmuri Daud, piạ i sie nạung měllewe longehẹ̌ su těngong Abimelekh hakịu i sie nitokol᷊ẹ̌ pinakapul᷊ẹ.

²Iạ e makitarimakasẹ su MAWU sěntiniạ tempo, ringangu tawẹ ědone mẹ̌dalo si Sie.

³Iạ e rụl᷊iagẹ̌ ual᷊ingu karạdiahangu MAWU; karimạko taumata kụ sẹ̌sẹ̌dakenge makaringihẹ̌ dingangu lumuasẹ̌.

⁴Apakaraloko MAWU e ringangku, mahịe i kitẹ sěngkahindọ měmantugẹ̌ arengʼE.

⁵Iạ e mẹ̌kal᷊iomaneng su MAWU, kụ i Sie simimbang, dingangu něliung iạ bọu haghin takụ.

⁶Taumata kẹ̌kaěpisang e mělẹ̌harapẹ̌ si Sie ringangu lụl᷊uasẹ̌, si sire tawẹ apa alasange waugu mamea.

⁷Taumata kẹ̌kaěbakengu soe mẹ̌kẹ̌kui kụ MAWU e sumimbang si sie, měliun sie wọu kal᷊awọu kasasěsẹ e.

⁸Malạekatu MAWU e mẹ̌děndiagạ taumata apang maimang, dingangu mělẹ̌liun sire wọu silakạ.

⁹ Pẹ̌pěndangkewe hala u apạ e kapiane MAWU e, kariangkamang taumata kụ mẹ̌tẹ̌těngkal᷊indung si Sie.

¹⁰Pěngadatẹ̌ko MAWU e, e i kamene umatʼE, u taumata maimang e tawe kakawusang e sarung.

¹¹Kal᷊awọu singa e mal᷊aing měngkạl᷊unusẹ̌ ual᷊ingu kaěnge mahal᷊i; arawe taumata kụ mạněmba MAWU e tawe kakawusange.

¹²Daringihẹ̌ko ei kal᷊awọu manga rariọ, takụ těntiroěng i kamene mangadatẹ̌ MAWU.

¹³ Mapulu umuri kamene manandu kụ makatarimạu mapia tangu?

¹⁴Kumbahang bue mapasẹ̌bangu kal᷊awọu wawera ral᷊akisẹ̌, dingangu abe kapulun tondol᷊ikụ.

¹⁵Pẹ̌těngkarau wue wọi ral᷊akisẹ̌ e, kụ pẹ̌koạbe mapia, kụ sěngapaʼm botonge pěhingidẹ̌ko pẹ̌darame.

¹⁶MAWU e mạnitị taumata maimang, i Sie e rụdaringihẹ̌ si sire kụ kụkui makịtul᷊ung.

¹⁷Arawe taumata mẹ̌kẹ̌koạ dal᷊akisẹ̌ e rẹ̌dokatengʼE; kereu i sire mate, i sire mal᷊ighạ kawul᷊enang.

¹⁸Kereu taumata maimang e kumui, MAWU e rumaringihẹ̌, dingangu měngambang si sire wọu kasasěsẹ.

¹⁹MAWU e maranin taumata kụ naunge napěndụ; i Sie měngambang taumata kụ tawe makakoạ apa-apa.

²⁰Mal᷊awọ kasasěsẹu taumata kụ mapia e, kai MAWU e měliun sie wọu patikụ ene.

²¹ Badange tatapẹ̌be kạdariagạ su MAWU, kụ bọu manga ruhine tawẹu sarang sěmbua kụ deng i kapědi.

²²Taumata ral᷊akisẹ̌ e sarung mateng karal᷊akise, taumata kụ mẹ̌bẹ̌binsịu taumata maimang e sarung i hukung.

²³MAWU e mapakasal᷊amatu manga ěllangʼE; apang mẹ̌tẹ̌těngkal᷊indung si Sie e sarung tawe i hukung.