Read Sangir MAZMURẸ̌ 35 Bible Online

MAZMURẸ̌ 35 - Sangir bible

MAZMURẸ̌ 35

¹Mazmuri Daud. MAWU, rokateko taumata apang dụdokạ si siạ e, seketeko taumata apang měmpạnekẹ si siạ e.

²Pěngal᷊ạko tamẹ dingangu kěllungʼU, kụ pẹ̌bangungko pẹ̌tul᷊ungu iạ e.

³Hengkẹ e těmbahu ringangu wěngko-Nu e pěndokạko taumata kụ měnẹ̌nahusu si siạ e. Pẹ̌berako si siạ u i Kau kai měnanal᷊amatẹ̌ku e.

⁴Balạete taumata kụ mapulu měmate si siạ e apakawatạ dingangu apakamea. Balạete taumata kụ mẹ̌gẹ̌gapaěng dumokạ si siạ e apahunsohọ tẹ̌tal᷊ạbingọ e.

⁵Balạete i sire pakisahusue su malạekatu MAWU e, kere wal᷊ẹ̌ka i tẹ̌těllạu anging.

⁶Balạete i sire pakisahusue su malạekatu MAWU su ral᷊eng kụ marěndung dingangu mal᷊ewehẹ̌ e.

⁷Seng tawẹ mangal᷊ene i sire mẹ̌taingu wal᷊atị i sire si siạ arau měmangka lohange pěnamẹ si siạ.

⁸Balạete i sire kaěnsakengu kawawinasa sěngkělěndịe. Balạete i sire i kasamẹ su ral᷊ungu sedẹ i sire hala kụ bọu ene manawo ringangu mawinasa.

⁹Tangu iạ e lumiagẹ̌ kahěnga-hěngang ual᷊ingu MAWU, naungku e mal᷊uasẹ̌ batụu i Sie napakasal᷊amatu iạ e.

¹⁰Dingangu kasěllahu ral᷊ungu naung iạ e nẹ̌bera, ”MAWU, i Kau e tạu kapanihingangʼE! I Kau e napakal᷊iwiru apang lome e wọu apang matoghasẹ̌ e, apang kasiang dingangu masunsara wọu měngangěpise.”

¹¹Kal᷊awọu apan sahidi ral᷊akisẹ̌ e němpẹ̌pětị dumokạ si siạ e, ringangu mangěnsilu iạ e nẹ̌koạ kal᷊awọu apan tawe takụ nikẹ̌kasingkateng.

¹²Kapiaku e niwal᷊isangi sire ringangu karal᷊akisẹ̌; iạ e nawul᷊usẹ̌ su ral᷊ungu kasasuen tiněnna.

¹³Su tempong i sire masakị, iạ e masusa ringangu tawe kumakaěng; iạ e kụkakurung kụ mẹ̌kẹ̌kal᷊iomaneng,

¹⁴kere mẹ̌kẹ̌kal᷊iomanengu sěngkatau anạu sěngkatau arau sěngkatau hapị kantalẹ̌. Iạ e kụkakurung sụsangị i sire tabidạu iạ mělẹ̌lutun ninangku e naněntung.

¹⁵Kaiso su tempong iạ masusa, i sire e mal᷊uasẹ̌, dingangu měmpẹ̌tatal᷊iwung měndokạ si siạ. I sire mạhundal᷊eng měmpẹ̌kẹ̌kempal᷊ẹ̌ mělẹ̌langehẹ̌ si siạ.

¹⁶I sire měngkai turusẹ̌ měmpẹ̌bẹ̌baheaun sěngkatau peosẹ̌, kạpěmandane siạ e ringangu pẹ̌bawinsị.

¹⁷Sarang kạděngụ e MAWU, sarang kạděngụe, i Kau e tumbạeng mạmanda samatang? Ambangeko iạ e wọu pěngangalon sire, pakal᷊iwirẹ̌ko niawaku e wọu kal᷊awọu manga singa ene.

¹⁸Tangu iạ e sarung makitarimakasẹ si Kau su tal᷊oarang umatʼU, ringangu mẹ̌dalo arengʼU su ral᷊ungu pẹ̌sasombang i sire.

¹⁹ Abe pakawalang iạ e i pẹ̌taghunalangu taumata apang dumokạ siạ e, tawẹ sẹ̌bapẹ̌ e apa. Abe wala iạ bansageng u taumata kụ mẹ̌bẹ̌binsị u iạ tawẹ alasange.

²⁰Bisaran sire e tawẹ himumune, i sire e mẹ̌kẹ̌karakim pěndal᷊inga su taumata kụ mẹ̌bẹ̌biahẹ̌ maghighilẹ̌ e.

²¹I sire e měmpẹ̌bẹ̌buheang si siạ e ringangu měmpẹ̌bẹ̌bera u i sire seng nakasilo kakanoạku.

²²Kaiso i Kau e MAWU, seng nakasilo hala; kumbahangbe mẹ̌těngkarěmasẹ̌ o MAWU kumbahangbe mẹ̌těngkarau wọu iạ e.

²³Pẹ̌pětịe tatawang pěrkaraku, o Ruataku ringangu MAWUku, tul᷊ungko iạ!

²⁴Tatawangeko iạ, u i Kau e adilẹ̌, o MAWU Ruataku, abe pakawala sekẹe mahul᷊iagu iạ e.

²⁵Kumbahang i pakawala i sire mẹ̌bera su ral᷊ungu naung i sire, ”Tarimakasẹ, u i kitẹ e seng něngěnsue niawane. Ěnning i kitẹ e seng kinahombangeng!”

²⁶Balạete taumata kụ mal᷊uasẹ̌ makasilo sunsaraku e i wingọ e ringangu měngkamea. Balạete taumata kụ mangobotu watangenge si siạ e, hinakaneng dingangu i pakamea.

²⁷Mal᷊owọko taumata kụ měningu makasilo siạ e i pakahino měmpahuliagẹ̌ dingangu mahul᷊uasẹ̌. Mal᷊owọko i sire masau su sul᷊ene mẹ̌berau, ”Mambeng mawantugẹ̌ MAWU! I Sie lụěnningu kasasalamatu ěllangʼE!”

²⁸Tangu iạ e sarung měhabaru kạadilʼU, ringangu mẹ̌dalo si Kau e kanandung ěllo.