Read Sangir MAZMURẸ̌ 36 Bible Online

MAZMURẸ̌ 36 - Sangir bible

MAZMURẸ̌ 36

¹Baugu měngangahạ kantarị. Bọi Daud, ěllangu MAWU.

² Dosa su ral᷊ungu naungu taumata ral᷊akisẹ̌ e, i sie mamben tawe matatakụ u Ruata.

³I sie mẹ̌pẹ̌pěndang batangenge wal᷊inewe nakalẹ̌ kapiane, hakịu tawe makapěndang sal᷊ane, kụ tawe mẹ̌bawinsịu ene.

⁴Kal᷊awọu wawerane ral᷊akisẹ̌, dingangu napenẹ u pěngangangakal᷊ẹ̌, kụ i sie semben tawe mẹ̌kakoạ mapia ringangu tawẹ pelesane.

⁵Su raral᷊okaěng i sie e mělẹ̌hingidu kararal᷊akisẹ̌ e; ringangu kakanoạ e tawẹ apa reng mapia, arawe ral᷊akisẹ̌ e i sie tawẹ kụdirine.

⁶MAWU, kakěndagʼU e karangẹ e kere langị, dingangu kasasatianʼU e sarang binawa.

⁷Kapia-Nu e timiol᷊ẹ̌ kere karangẹu wul᷊ude, ringangu kạadilʼU e karal᷊unge kere taghal᷊oang; taumata ringangu binatang e nipiara-Nu, MAWU.

⁸Enẹ e kaarěgane kakěndagʼU, o Mawuʼ taumata e mẹ̌sirung su ral᷊ungu naụu panidʼU.

⁹I sire měngkạsaheng kaěng mạhěmpal᷊iu su Wal᷊e-Nu, ringangu inumang bọu sal᷊ụʼU e makạhimatụ.

¹⁰I Kau e simbul᷊u patikụ diadikang, su ral᷊ungu tualagʼU e i kami makasilo tualagẹ̌.

¹¹Karimạko i Kau e tatapẹ̌be kụkěndagu taumata kụ makạkiral᷊a si Kau, ringangu mẹ̌kẹ̌koạ mapia su taumata kụ naunge tulusẹ̌.

¹²Kumbahangbe iạ totokang u taumata mal᷊aobotẹ̌, arau tokol᷊angu taumata ral᷊akisẹ̌ e.

¹³Kakěllạ e, taumata kụ mẹ̌koạ dal᷊akị e seng nanawo, i sire seng nasue timeledẹ̌ dingangu seng tawe saụ makapẹ̌pětị.