Read Sangir MAZMURẸ̌ 37 Bible Online

MAZMURẸ̌ 37 - Sangir bible

MAZMURẸ̌ 37

¹Bọi Daud. Piawe sumal᷊iapadu taumata ral᷊akisẹ̌ e, kumbahangbe mananoin taumata kụ nẹ̌koạ pẹ̌sasal᷊a.

²U i sire kai mal᷊ighạ maparung kere rěmpugẹ̌, dingangu malolang kere sasuang melong.

³Pangimangke su MAWU, ringangu pẹ̌koạ e mapia, pẹ̌tanạ e su wanua ene ringangu pakasatiạ e.

⁴Pẹ̌deạko karal᷊unsemahu e su MAWU, i Sie sarung mapakasaheng ěnningu naungu.

⁵Sarakangke pẹ̌bawiahu e su MAWU, pěharape si Sie, i Sie sarung mẹ̌tul᷊ung i kau.

⁶I Sie sarung manodẹu satianu kere tualagẹ̌, dingangu katatulusu e kere ěllo.

⁷Pěngampal᷊ẹ̌ko MAWU e pakatatapẹ̌, pahědoiko pakasabarẹ̌ sarang i Sie mẹ̌karạdiahang. Abe ghěnggangu taumata wiahe mapia, arau si saing měngẹ̌ngakal᷊ẹ̌.

⁸Kumbahang mẹ̌bawal᷊uang dingangu sumahokan dal᷊ungu naungu ene e samatang makawawa silakạ.

⁹U i saing mẹ̌koạ dal᷊akisẹ̌ e sarung ipakaparung, arawe i saing mělẹ̌harapẹ̌ su MAWU e sarung kapusakatengu ěntana ene.

¹⁰Taumata ral᷊akisẹ̌ e sarung tạ kararěnane maparung, kamageng deakeng, i sie seng tawẹ dise.

¹¹ Taumata naunge masanạ sarung kapusakatengu ěntana ene, dingangu makateěng pẹ̌bawiahẹ̌ mạsukụ e.

¹²Taumata ral᷊akisẹ̌ e měngẹ̌ngol᷊angu ral᷊akisẹ̌ su taumata mapia, ringangu mạbẹ̌nsing měmanda si sie.

¹³Kaiso MAWU e lụl᷊egen taumata ral᷊akisẹ̌, u i Sie masingkạu kasueěngu taumata ene seng masandigẹ̌.

¹⁴Taumata ral᷊akisẹ̌ e měngasa pedane ringangu měngěnạu papitị e i pěmate taumata kasiang dingangu sunsara, waugu i pěmotọ taumata wiahe mapia.

¹⁵Arawe taumata ral᷊akisẹ̌ e sarung i kapilị u pedane sẹ̌sane, naěnakeng i sire e sarung pẹ̌diang.

¹⁶Barang pẹ̌kadodọ tataghuanengu taumata mapia e, limembong maarěga wọu kakakalạu taumata ral᷊akisẹ̌ e.

¹⁷Batụu kawasan taumata ral᷊akisẹ̌ e sarung pẹ̌diangu MAWU, arawe taumata mapia e těntanudangʼE.

¹⁸MAWU e mẹ̌děndiagạ pẹ̌bawiahu taumata maimang, pusakạ tataghuaneng i sire e tatapẹ̌ sarang marěngụ-děngụ.

¹⁹Su tempong kasasěsẹ i sire tawe sarung masunsara, su tempong karal᷊unusẹ̌ e i sire sarung i pẹ̌dẹ̌dal᷊embo.

²⁰Arawe taumata ral᷊akisẹ̌ e sarung mawinasa, sědụu MAWU e sarung mailang kere bungang su wimbaenge, i sire sarung maparung su ral᷊ungu tipu.

²¹Taumata ral᷊akisẹ̌ e mạngědang kụ tawe měnanul᷊e, arawe taumata mapia e mẹ̌gẹ̌gěllị dingangu naung mal᷊uasẹ̌.

²²Taumata lẹ̌al᷊amatengu MAWU e sarung kapusakatengu ěntana ene, arawe taumata lẹ̌aneěngʼE sarung i tokol᷊ẹ̌.

²³MAWU e měngẹ̌ngahạ taumata su ral᷊eng kụ hinon dal᷊engange, i Sie mạnoghasẹ̌ taumata kụ pẹ̌bawiahe nẹ̌tatal᷊ahino si Sie.

²⁴Kereu manawo, i sie tawe sarung mal᷊esẹ gẹ̌guwạ, batụu MAWU e mạngumpaedẹ̌ limane.

²⁵Nạung iạ deng mangudạ sarang seng naghurang, tawẹ běke kụ iạ nakasilo taumata mapia nitěntangu MAWU, manga anạ arau pulunge nakoạ taharorong.

²⁶I sie hanesẹ̌ mẹ̌gẹ̌gěllị su ědang dingangu měngẹ̌ngonggọ, dingangu manga anạ e nakoạ al᷊amatẹ̌ si sie.

²⁷Těntangke apan dal᷊akisẹ̌, kụ pẹ̌koạ e mapia, tangu waugu sarang karěngụ e hitenu e matanạ su ěntana ene.

²⁸Batụu MAWU e mẹ̌kẹ̌karalọu kakanoạ mapia ringangu adilẹ̌, taumata kụ satia si Sie, tawe i wawala-Ne pakal᷊anting. I Sie mạněntanudẹ̌ si sire sarang marěngụ-děngụ, arawe hiten taumata ral᷊akisẹ̌ e sarung upuang.

²⁹Taumata maimang e sarung kapusakatengu ěntana ene, ringangu matanạ sarang marěngụ-děngụ.

³⁰Taumata mapia e mẹ̌bisara maudupẹ̌, kụ i sie měngkate hanesẹ̌ su ral᷊ungu wawerane.

³¹Titam Mawu Ruata e kạdaresọ su ral᷊ungu naunge, i sie tawe měndal᷊enga wọu ene.

³²Taumata mapia e pẹ̌pahimangengu taumata ral᷊akisẹ̌ e kụ mẹ̌dẹ̌deạ lěsabu měmate si sie.

³³Arawe MAWU e ta mapakawalan sie manawo su l᷊iman dokạ, arau i hukung su tempong pělahukung.

³⁴Pěharape su MAWU ringangu daringihẹ e tita-Ne, kụ i Sie měhengkẹ i kau waugu kapusakatengu ěntana ene; i kau sarung makasilo taumata ral᷊akisẹ̌ e i pakaparung.

³⁵Iạ e wọu nakasilo sěngkatau ral᷊akisẹ̌ e, puluang mẹ̌kotarila; i sie mẹ̌sul᷊ungu kalu matawa kụ hamụ e maral᷊ung.

³⁶Su tempong iạ[23] simahe, i sie selain tawẹdise, i sie takụ dẹ̌deakeng, kaiso tawe kinareạ.

³⁷Kakěllạ e taumata mapia ringangu naunge tulusẹ̌ e; taumata kụ mapulu mẹ̌dame ute piạ be tempone ramahi.

³⁸Arawe taumata warạdosa e sarung i pakawinasa; pal᷊ahiten sire e sarung i pakaparung.

³⁹MAWU e mapakasal᷊amatu taumata maimang, dingangu měnirung si sire su tempong kasasěsẹ.

⁴⁰I Sie mẹ̌tul᷊ung dingangu mapakasal᷊amati sire, ringangu mapakal᷊iun sire wọu kal᷊awọu taumata ral᷊akisẹ̌ e, watụ u i sire mẹ̌tẹ̌těngkal᷊indung si Sie.