Read Sangir MAZMURẸ̌ 38 Bible Online

MAZMURẸ̌ 38 - Sangir bible

MAZMURẸ̌ 38

¹Mazmuri Daud su tempong naněmbang gaghěllị tatahěndung.

²MAWU, abe pěhukungu iạ e su ral᷊ungu libutu-Nu, abe panunsara si siạ su ral᷊ungu ral᷊angehʼU.

³PapitịʼU tuměpasẹ̌ mělesẹ badangku, lima-Nu e kapěndangeng mawěhạ mangěpisẹ̌ siạ.

⁴Iạ e masakị matědụ ual᷊ingu ral᷊angehʼU; tawẹ apa kụ deng mahuweka su wadangku ual᷊ingu rosaku.

⁵Iạ e nawul᷊usẹ̌ su ral᷊ungu lěbang pẹ̌sasal᷊aku, papasaěngangu rosaku e tumanịu mawěhạ siạ e.

⁶Kal᷊awọu lesẹku e něnana kụ dal᷊urune mawuhụ, batụu iạ e seng nẹ̌těngkawodo.

⁷Iạ e nasumagẹ̌ dingangu nẹ̌bětụ, kanandung ěllo iạ e tụturuhẹ̌ dingangu kụkěndung.

⁸Lěhabẹ̌ nanutung badangku, tawẹu mapia su wadangku.

⁹Iạ e nakakorọ dingangu kinasueěngu toghasẹ̌ku, iạ e sụsiki kinahian naungku e taghiawahẹ̌.

¹⁰MAWU, i Kau e masingkạ u kal᷊awọu ěnningku, kakahiorọku tawẹ u mạbawuni si Kau.

¹¹Pẹ̌pusoku e tụtarěntung, toghasẹ̌ku e nailang, mataku e seng nawilosẹ̌.

¹²Manga hapịku e mẹ̌tẹ̌teghang ual᷊ingu sakịku, saral᷊aing ghal᷊ipohong anạu sěngkatauku e nẹ̌těngkaraung iạ e.

¹³Taumata kụ mapulu měmate si siạ e něnakẹ sasaunge siạ; kụ mapulu měnilakạ siạ e němatakụ kụ mangumbang siạ e.

¹⁴Arawe iạ e mẹ̌sul᷊ungu taumata wengelẹ̌ kụ tawe makararingihẹ̌, mẹ̌sul᷊ungu taumata mou kụ tawe makawawera.

¹⁵Těngadẹ̌ iạ e mẹ̌sul᷊ungu taumata kụ tawe rimaringihẹ̌, ual᷊ingu ene tawe rumarendehẹ̌.

¹⁶Arawe iạ e mělẹ̌harapẹ̌ si Kau e MAWU, kụ i Kau e, MAWU Ruataku, simimbang siạ.

¹⁷Abe wala sekẹku e lumuasẹ̌ makasilo susaku, abe wala i sire ral᷊etabe, kamagengu iạ e wal᷊unsengehẹ̌.

¹⁸Iạ e masarạ manawo, turusẹ̌-turusẹ̌ kapěndangeng sakịku.

¹⁹Iạ e mangakung kal᷊awọu rosaku; naungku e kal᷊inso mẹ̌tẹ̌tiněnnaʼm pẹ̌sasal᷊aku.

²⁰Kal᷊awọu taumata kụ dụdokạ si siạ e mal᷊awọ dingangu matoghasẹ̌, i sire mạbensingu kakakoạu pẹ̌bawiahẹ̌ku.

²¹Taumata kụ měmal᷊isẹ̌ kapia ringangu karal᷊akisẹ̌ e sumědụ siạ, ual᷊ingu iạ e mẹ̌kẹ̌koạ mapia.

²²O MAWU, abe paněntangu iạ, abe pakarau wọu anuku o Mawu Ruataku.

²³Děntako pakarol᷊ạ pẹ̌tul᷊ungu iạ e, o MAWU mananal᷊amatẹ̌ku.