Read Sangir MAZMURẸ̌ 39 Bible Online

MAZMURẸ̌ 39 - Sangir bible

MAZMURẸ̌ 39

¹Baugu měngangahạ kantarị. Mazmuri Daud. Baugi Yedutun.

²Tiněnnaku e, ”Iạ mapulu měndiagạ batangengku tadeạu tawe mẹbaradosa ringangu lilaku. Iạ e mạdiri měbisara karěngụewen taumata ral᷊akisẹ̌ e wědang marani.”

³Iạ e mẹ̌těngkarěmasẹ̌ marihutu, hakịu makarugi watangengku e hala. Ringangu sigěsạku e mangkeng kapěndangeng kakạběhạ e;

⁴iạ e nikěllọu ghaghiantang masaria. Mangkeng tiněnnaěng, mangkeng kakạsusane naungku, kasueěnge nẹ̌berạ e iạ e.

⁵”MAWU, paul᷊ịko kai angerẹ papateku, tadeạu iạ e masingkạ u kai kanimbụ pẹ̌bawiahẹ̌ku.”

⁶Enẹe kanimbụ tinantu-Nu e umurẹ̌ku! Baugʼi Kau e pẹ̌bawiahẹ̌ku e tawẹ mangal᷊ene. Mamben těngadẹ̌, taumata e mẹ̌sul᷊ungu tatiụu singongo e samatang,

⁷pẹ̌bawiahe lụlawesẹ̌ kere kěngkau. Kěbị katatasibune e mamben sia-sia; i sie měngẹ̌ngěndụu arětạ, kaiso wěga wue i sai sarung mẹ̌pakẹ u ene.

⁸Ini e apạ e takụ pahẹ̌doěng MAWU? Seng si Kau e pělaharapengku.

⁹Pěllọko iạ e wọu patikụ dosaku, abe wala iạ e makoạ laheghesangu taumata longong.

¹⁰Iạ e marěmasẹ̌ dingangu tawe mělahengẹ mohongku, u seng i Kau e naněntiro si siạ.

¹¹Al᷊ạ e hukumangʼU wọu anuku, u iạ e maraning mate ual᷊ingu pěmaměbahʼU.

¹²Taumata e kahiam pẹ̌sasal᷊ane; nịlahukungʼU ringangu nịpapahangʼU kere tahuwu kụ ipakagholọʼU e apang kụ maarěga si sie. Mamben těngadẹ̌, taumata e mẹ̌sul᷊ungu sopạ u singongo samatang.

¹³Pẹ̌daringihẹ̌ko kakal᷊iomanengku e MAWU naunge wue kakindoạku; abe katanạ marěmasẹ̌ kamagengu iạ e kụkiạ. Mẹ̌sul᷊ungu kakěpal᷊ʼi upung i kami e, tumbạeng kạdodọ tempo iạ e měnumpang dingangʼU.

¹⁴Kumbahang měnahaghe si siạ e tadeạu iạ e riọ masěnaěng, kal᷊imonang iạ e rumal᷊eng ringangu semben tawẹ dise.