Read Sangir MAZMURẸ̌ 40 Bible Online

MAZMURẸ̌ 40 - Sangir bible

MAZMURẸ̌ 40

¹Baugu měngangahạ kantarị. Mazmuri Daud.

²Dingangu kakakědang iạ e mạngampal᷊ẹ̌ tul᷊umang u MAWU; bọu e i Sie mẹ̌sẹ̌sěmpị siạ dingangu rụdaringihẹ̌ kal᷊iomanengku.

³I Sie němol᷊eng si siạ e wọu lohange makasilakạ, bọu tampạ mal᷊ebo. I Sie napẹ̌tanạu iạ su wowom bukidẹ̌ batu, hakịu lempangku e maraitẹ̌.

⁴I Sie něněntirom mẹ̌kantarịu kakantarị buhu e si siạ, lagụen daralo su Ruatang kitẹ. Lawọ taumata e nakasilo ringangu něngkatakụ, bọu e nangimang su MAWU.

⁵Kariangkamang taumata apang mạngimang su MAWU, kụ ta tumatol᷊e maněmba manga mahang duata, arau makitul᷊ung su taumata maobotẹ̌.

⁶MAWU, kerẹeng kal᷊awọe munara-Nu e waugi kami, o MAWU Ruataku, i Kau e tawẹ sihinge! Mal᷊awọ hingidʼU e makạdal᷊inaụ baugi kami, kụ tawe i kawěke kěbị.

⁷ Sasěmba ringangu laidopẹ̌ gaghěllị e tawe i kapulu-Nu; sasěmba tẹ̌tutungang dingangu sasěmba i pěngěmụ dosa e tawe tatuntukangʼU. Kaiso i Kau e seng něngonggọu tul᷊i si siạ kụ makaringihẹ̌ tingihʼU.

⁸Bọu e iạ měhengetang, ”Ini iạ e, su ral᷊ungu rul᷊ungu bukẹ̌ mạbawohẹ baugu iạ.

⁹Iạ e mal᷊uasẹ̌ mẹ̌koạ kapulu-Nu, Mawuʼ tita-Nu e takụ desokang su naung.”

¹⁰Su ral᷊ungu komol᷊angu umatʼU e takụ i wokạ habaru ral᷊uasẹ̌ u i Kau e seng napakasal᷊amati kami e. Kụ tawẹ ẹ̌done hal᷊ẹ̌ ene takụ i wẹ̌bokạ, i Kau e masingkạ u kěbị ene MAWU.

¹¹Habaru kasasal᷊amatẹ̌ ene e tawe takụ i resọ su ral᷊ungu naung, tul᷊umang dingangu kasasatianʼU e hanesẹ̌ takụ i lẹ̌habarẹ̌. Su těngong komol᷊angu umatʼU e iạ tawe mẹ̌těngkarěmasu watangeng, kaiso kawe mạmokạu kakěndagẹ̌ dingangu kasasatianʼU.

¹²MAWU, kumbahangbe měngědo kuměndagu iạ e; těntanure wue iạ e tiniạ dingangu kakěndagẹ̌ dingangu kasasatianʼU.

¹³Iạ e niliwungangu hombang mal᷊awọ, kakěpal᷊e tawe kinarekeng. Iạ e sẹ̌sahusuangu kal᷊awọu rosaku sarang iạ e tawe nakasilo. Kal᷊awọ e něngalembo wọu utạ su tembọku, nakakanawo naungku e.

¹⁴O MAWU, ambangeko iạ, MAWU pẹ̌bal᷊ikěkasẹ̌ko mẹ̌tul᷊ungu iạ e!

¹⁵Balạete taumata kụ mapulu měmate siạ e i kawatạ kụ tumal᷊ang i tal᷊ạbingọ e. Balạete taumata kụ lụliagu hombangku e pakisekehẹ̌ dingangu pakihinakane.

¹⁶Balạete taumata kụ lụl᷊ěgeng iạ e huměkosẹ̌ dingangu mamea.

¹⁷Karimạko kěbị taumata kụ maněmba si Kau mahul᷊uasẹ̌ dingangu mahul᷊iagẹ̌, dingangu patikụ apang mẹ̌kẹ̌karalọu kasasal᷊amatẹ̌ bọu anu-Nu e turusẹ̌ mẹ̌berau, ”Mamben těngadẹ̌ mawantugẹ̌ MAWU e!”

¹⁸Iạ ini e kasiang dingangu lome, kaiso MAWU e měnẹ̌naung siạ. Seng i Kau e mẹ̌tatul᷊ung dingangu mananal᷊amatẹ̌ku e, kụ piawe matěntang Mawuʼ!