Read Sangir MAZMURẸ̌ 43 Bible Online

MAZMURẸ̌ 43 - Sangir bible

MAZMURẸ̌ 43

¹Onggotengkong kạadilẹ̌ e iạ, o Ruata, tatawangeko hakẹ̌ku e bọu wansa kụ duruhaka. Liuko iạ e wọu taumata ral᷊akisẹ̌ e ringangu tahapěngakal᷊ẹ̌.

²I Kau e Ruata měnanirungku; unụ e i Kau e měněntangu iạ? Unụ e iạ harusẹ̌ tiniạ pẹ̌tẹ̌tatahang ual᷊ingu pananědạu manga rokạku?

³Pělahẹkon satianʼU waugu pěnualagẹ̌ dingangu pěnata si siạ, tadeạu iạ e mẹ̌bal᷊ị sarang Sion, bukidʼU susi e[25] ringangu sarang Bal᷊e katatanakengʼU.

⁴Tangu iạ e humaung pananěmbaěng su Mawu, mẹ̌těngon Duata pungu karal᷊unsemahẹ̌ku. Iạ e hědo mẹ̌kantarị dingangu měnalangu kěcapi, baugu mẹ̌pudi si Kau, o Ruata, Ruataku.

⁵Kawe unụ e naungku masusa ringangu kal᷊indasa? Iạ e mělẹ̌harapẹ̌ su Ruata, tangu iạ e sarung makitarimakasẹ̌ kapia si Sie; su Ruataku ringangu mananal᷊amatẹ̌ku.