Read Sangir MAZMURẸ̌ 44 Bible Online

MAZMURẸ̌ 44 - Sangir bible

MAZMURẸ̌ 44

¹Mazmuru ghal᷊ipohong Korah. Kakantarị tatěntiro. Waugu měngangahạ kantarị.

²O Ruata, i kami e seng nakaringihẹ̌ hala bẹ̌ke niwěkeng manga i upung i kami mạanum munara masěllahẹ̌ kinoạʼU su tempo kal᷊imona e.

³I Kau sẹ̌sanu něnokol᷊ẹ̌ manga wansa tadeạu umatʼU měnatapẹ̌ su wanuan sire. Manga wansa wal᷊ine e nisilakatengʼU, arawe umatʼU e niwala-Nu niapasombọ.

⁴Ěntana ene tawe niahon sire ringangu warạ; wal᷊inewe ringangu katoghasi sire hala i sire nakawatạ, kaiso kawe kahiang kawasa ringangu tualagu rarěnta-Nu, u i Kau e nẹ̌tatal᷊ahino su manga umatʼU.

⁵Seng i Kau Ratuku dingangu Ruataku, kụ nẹ̌gěllịu kal᷊auntu su manga umatʼU.

⁶Kahiang kawasa-Nu i kami e nakawatạ dokạ i kami, ringangu napẹ̌samal᷊ẹu apan taumata ku něngalo si kami.

⁷U iạ e tawe mangumbala su papitịku, pedaku e mal᷊ain tawe makasalamatẹ̌ si siạ.

⁸Kaiso kawe i Kau e nakasal᷊amatẹ̌ si kami wọu rokạ, dingangu namatạ kal᷊awọu taumata apang mẹ̌bẹ̌binsị i kami.

⁹Tangu i kami sarung tiniạ mạpakasěllahi Kau, ringangu turusẹ̌-turusẹ̌ makitarimakasẹ si Kau.

¹⁰Kaiso orasẹ̌ ini i Kau e naněntang i kami ringangu napakawalang kami kinawatạ. I Kau e sen tawe lai tamai timaking buntuang i kami.

¹¹Niwala-Nu e i kami timal᷊angu watangeng i kami wọu rokạ i kami, ringangu i sire nangaho arětạ i kami.

¹²Niwala-Nu e i kami nipotọ kere domba, ringangu nipẹ̌sal᷊iawuhʼU e i kami su tal᷊oarang manga wansa.

¹³Niwal᷊ụʼU e umatʼU mamura, ringangu tawe nakaěbạ untune apa-apa.

¹⁴I kami e pinakariadi-Nu laheghesangu manga l᷊ampung i sire měmpẹ̌lẹ̌langehẹ̌ dingangu měmpạhul᷊ẹ̌geng kami.

¹⁵Pinakariadi-Nu i kami e wanggilu pěnanindiru manga wansa; i sire mapạkilingu těmbọ i sire kapẹ̌lěhinakange si kami.

¹⁶Kanandung ěllo iạ e lẹ̌hodateng, makạpěndang mamea, ringangu tawe pangimangeng,

¹⁷ual᷊ingu nakaringihẹ̌ tatahumea ringangu lahinakang bọu mohongu manga rokạ dingangu tahapěngune.

¹⁸Kěbị ene seng himombang si kami manilaing i kami e tawe miwul᷊eng Kau arau tawẹ pandungange su riandi-Nu e si kami.

¹⁹Naungi kami e tawe mẹ̌sunial᷊i Kau e; tita-Nu e tawe i wawalang kami.

²⁰Kaiso nitěntangʼU e i kami su ral᷊ungu kararěndung; i kami e tawe makapẹ̌kapura su tal᷊oarang binatang marangěngisẹ̌.

²¹Kereu manga i kami seng tawe lai maněmba Ruata, kaiso kawe seng mẹ̌kal᷊iomaneng su ruata wal᷊ine,

²²Nal᷊ahẹu Mawu Ruata e sarung makakasingkạu ene, batụu i Sie kai seng nakasẹ̌sui rahasian dal᷊ungu naung i kami e.

²³ Waugi Kau e i kami měngkate pẹ̌patakutangu papate, dingangu kẹ̌koateng kere domba papotokang.

²⁴Pẹ̌bangungke MAWU! Unụe i Kau kawe mẹ̌tẹ̌tikị? Pẹ̌bangungke! Kumbahang tumal᷊ikudi kami e sarang marěngụ-děngụ.

²⁵Kawe unụe i Kau e mẹ̌kẹ̌kěmbuni, ringangu miwul᷊en sunsara ore susan naung i kami?

²⁶I kami e nanawo napapěpohẹ̌ su ěntana, nakaral᷊oka su ral᷊ungu awul᷊ẹ̌ ual᷊ingu ta nakauntu.

²⁷Pẹ̌bangungke ringangu rěntako pẹ̌tul᷊ung i kami, ambangeko i kami ual᷊ingu kakěndagʼU.