Read Sangir MAZMURẸ̌ 49 Bible Online

MAZMURẸ̌ 49 - Sangir bible

MAZMURẸ̌ 49

¹Mazmuru ghal᷊ipohong Korah. Baugu měngangahạ kantarị.

²Pẹ̌daringihẹ̌ko, ei kal᷊awọu wansa e, pěmpẹ̌taingko tul᷊i, ei ral᷊ohon dunia,

³baewe taumata wiasa, arau taumata su horone, baewe tau kasiang, arau l᷊ai tau kalạ.

⁴Iạ e mẹ̌berang kal᷊awọu wawerang kapelesa, buan sipirangku e enẹ e maral᷊ung.

⁵Iạ e sarung měnaung baweran sasaili, ringangu mělahẹu mangal᷊ene kạpěngobị e kěcapi.

⁶Iạ tawe matakụ su tempong kasasěsẹ, su tempong iạ nipẹ̌tatal᷊iwungangu rokạ dal᷊akisẹ̌ e.

⁷I sire e mạngumbala kakakalạ i sire, ringangu měmpạngobotu arětạ i sire.

⁸Mamben tawẹ u sarang sěngkatau makasal᷊amatẹ̌ anạ u sěngkataune, arau měmaehẹ̌ tatubuse su Mawu Ruata.

⁹Manilaing apa sarung gělikange kai mang tawe makasukụ; tumanịu mal᷊ěgadẹ̌ arěgan tatubusẹ̌ niawane,

¹⁰tadeạu i sie mal᷊iwirẹ̌ bọu papate ringangu makapẹ̌biahẹ̌ sarang marěngụ-děngụ.

¹¹Tala, i sie sarung makasilo u taumata pelesa e mal᷊aing mate. Taumata longong dingangu wodo e mal᷊aing lawọ mawinasa, ringangu maněntangu arětạ e waugu taumata wal᷊ine.

¹²I sire sarung mẹ̌tanạ su lěbing sarang marěngụ-děngụ; dingangu seng ene e katatanakeng i sire e hatede, manilaing kal᷊imona e i sire mạnaghuang ěntana mal᷊awọ e.

¹³Taumata e tawe měngkai měbẹ̌biahẹ̌ su ral᷊ungu kararotong; mẹ̌sul᷊ungu binatang, kụ i sie mal᷊aing sarung mawinasa.

¹⁴Kerene pal᷊edu l᷊iman taumata kụ měngkai mạngumbala watangenge, dingangu tempo ramahin taumata kụ mạbiul᷊u wawerane.

¹⁵Mẹ̌sul᷊ungu domba, kụ i sire nighelarẹ̌ baugu mate; papate e sarung makoạ lukadi sire. Deng mal᷊uka-l᷊ukadẹ̌ i sire e kinawatạu taumata matul᷊idẹ̌; badang i sire e tạ kararěnane mawuhụ su runian tau nate, marau wọu katatanakeng u taumata marotong.

¹⁶Arawe Ruata e sarung mapakal᷊iwiru iạ, i Sie sarung měliwiru iạ bọu kawasam papate.

¹⁷Abe katakụ mạengu sěngkatau e makalạ, kụ arětạ e matamba mal᷊awọ.

¹⁸U su tempom papate e i sie tawe makawawa apa-apa, arětạ e sarung tawe rumělusẹ̌ sarang lěbing dingange.

¹⁹Orewe lai kamagengu sěngkatau e mẹ̌barạuntu su ral᷊ungu pẹ̌bawiahe, ringangu měngkate su tatendeng ual᷊ingu kal᷊awọu ěbạ e,

²⁰i sie sarung makatol᷊e su manga i upung i sire lai sarung tampạ u kararěndung sarang marěngụ-děngụ.

²¹Taumata tawe měngkai mẹ̌bẹ̌biahẹ̌ su ral᷊ungu kakakalạ, kerẹewe binatang, i sie mal᷊aing sarung mawinasa.