Read Sangir MAZMURẸ̌ 50 Bible Online

MAZMURẸ̌ 50 - Sangir bible

MAZMURẸ̌ 50

¹Mazmuri Asaf. MAWU Ruata Limembong Kawasa e, něhengetang; i Sie mạmohang su kạguwạu dunia e wọu sẹ̌bangeng sarang sẹ̌dapeng.

²Bọu Sion, soa kal᷊enggihange, Duata kụ siměpụ dingangu tualagʼE.

³Duatang kitẹ kụ diměnta kụ bal᷊inewe kạtatanạ marěmasẹ̌, i Sie nikal᷊imonaěngu putung kụ taghal᷊ẹ̌ mělẹ̌lewa, lẹ̌likutangu rěllang maihạ.

⁴I Sie kụkui langị dingangu runia tadeạu mẹ̌sahidin Sie měhukung umatʼE.

⁵AngkuěngʼE, ”Tampungko patikụ umatẹ̌-Ku kụ seng nẹ̌taingu pẹ̌dariandi ringang-Ku, ore lai i ghuatingu sasěmba pinotọ.”

⁶Langị mělẹ̌habaru Ruata e měhukungu umatʼE, ore lai i Sie sẹ̌sane mělahukunge.

⁷”Pẹ̌daringihẹ̌ko, umatẹ̌-Ku, Iạ mapulu měhengetang, Israel, Iạ mapulu mẹ̌sahidi si kamene; Iạ ini e kai Ruata, Ruatang kamene.

⁸Bal᷊inewe ual᷊ingu ghaghellịu Iạ měngěnsilẹ̌ si kamene; sasěmba tinongkạu e tiniạ piạ su těngo-Ku.

⁹Iạ tawe mẹ̌gaghausẹ̌ sapi ringangu těndạu, arau kambing bọu ghapaěngu binatangu;

¹⁰u kal᷊awọu binatang su kěhu e kai tataghuaneng-Ku, ringangu binatang kụ hiwune su wawul᷊urange.

¹¹Kal᷊awọu manụ u winalangeng su wawul᷊urange mal᷊aing tataghuaneng-Ku, ringangu kal᷊awọu riadikang kụ mẹ̌bẹ̌biahẹ̌ su wanua l᷊inggi e.

¹²Kereu Iạ e mahutung, ta wahal᷊uasu Takụ i ul᷊ị si kamene, u kěbị sěndal᷊ohon dunia e kai tataghuaneng-Ku.

¹³Iạ tawe kumakinạ gěsin sapi esẹ, dingangu tawe lai měnganginung dahang kambing esẹ.

¹⁴Pẹ̌gěllịkon sasěmba tatarimakasẹ su Mawu Ruata,[28] seng nihino riandinu e su Karangetange.

¹⁵Pẹ̌kuị e si Siạ su tempong kasasěsẹ, Iạ e sarung mapakal᷊iwiri kamene, ringangu i kamene sarung mẹ̌dalo si Siạ.”

¹⁶Arawe su taumata ral᷊akisẹ̌ e MAWU e něhengetang, ”I kau e tawẹ hakẹ̌ e mẹ̌beran tita-Ku e, dingangu mẹ̌bisarang hal᷊ẹ̌ u pẹ̌dariandi-Ku e.

¹⁷U i kau e mạdiri měnarimạu sasal᷊ěntihọ-Ku, tawe mangakung manga tita-Ku.

¹⁸Kereu i kasilonu e sěngkatau tahatako, i kau tumol᷊e si sie, ringangu i kau e mẹ̌dal᷊ahapịu apan taumata puluang mawuang.

¹⁹I kau e masau mẹ̌beram bawera ral᷊akisẹ̌, dingangu měngkai sadia mẹ̌koạ tondo l᷊ikụ.

²⁰I kau e sěntiniạ měngkai mělẹ̌hodatẹ̌ anạu sěngkataunu e, ringangu mẹ̌pẹ̌pawera su anạu sěngkataunu sěmpụ tinai.

²¹Kai ene e kẹ̌koatengu, kaiso Iạ e měngkate marěmmasẹ̌, kụ su tiněnnanu e Iạ kai mẹ̌sul᷊ung i kau. Kai orasẹ̌ ini e Iạ měheghesẹ̌ si kau, ringangu kěbị ene e Takụ kinoạ mal᷊ahẹ baugi kamene.

²²Nẹ̌naungeko, ei kamene apan niwul᷊en Duata; pakariagạko kumbahang sarang i kamene Takụ i pakawinasa, dingangu tawẹ apa kụ deng měngambang.

²³Taumata kụ mẹ̌gěllịu tatarimakasẹ kere sasěmbane, ute seng i sie e mạngadatẹ̌ si Siạ; dingangu su taumata kụ něndiahin dal᷊eng kụ sarung Takụ těbokang u kasasal᷊amatẹ̌ bọu anu-Ku.”