Read Sangir MAZMURẸ̌ 51 Bible Online

MAZMURẸ̌ 51 - Sangir bible

MAZMURẸ̌ 51

¹Baugu měngangahạ kantarị. Mazmurẹ̌ nikarang i Daud

² samurin sie nipẹ̌beraěngu Nabi i Natan ual᷊ingu nawuang dingangi Batsyeba.

³Tal᷊ěntụkong iạ e Mawu, u i Kau e mang těbe kụkěndagẹ̌, dědasẹ̌ko rosaku kahiang kakěndagʼU masaria.

⁴Uhasẹ̌ko kal᷊awọu karal᷊akisẹ̌ku; burěsiko iạ bọu rosaku.

⁵Batụu iạ měngakung kal᷊awọu pẹ̌sasal᷊aku, dosaku mang hanesẹ̌ kẹ̌katahěndungang.

⁶ Su těngo-Nu, su těngo-Nu e samatang iạ e nẹ̌dosa, dingangu takụ kinoạ apang kụ lẹ̌ěnnaěngʼU e ral᷊akisẹ̌. Tangu hinone wue i Kau e měhukungu iạ, u kawe adilẹ̌ e putusangʼU.

⁷Mamben těngadẹ̌, iạ e ral᷊akisẹ̌ dokeng piněhěnding, dingangu nẹ̌dosa reng dokeng bọu gandongang.

⁸I Kau e měnẹ̌nuntụ katatulusu naung; pẹ̌papinunụko ěndumangku e ringangu kapelesa-Nu.

⁹Susiko iạ e, kụ iạ sarung mawurěsi; uhasẹ̌ko iạ tangu iạ e sarung něngalembong kawirane wọu kapesẹ̌.

¹⁰Balạete iạ deng makaringihẹ̌ habaru ral᷊uasẹ̌, tadeạu naung kụ nạung nịlahěmpungʼU ini e reng saụ lumuasẹ̌.

¹¹Pẹ̌bihungkong gati-Nu wọu kal᷊awọu rosaku, dingangu rẹ̌dasẹ̌ko kal᷊awọu pẹ̌sasal᷊aku.

¹²Apal᷊ětoko naung kụ matilang e si siạ, o Mawu, tal᷊imbuhueko ěndumangku e ringangu kal᷊oko mararagẹ̌.

¹³Abe pěnokol᷊u iạ e wọu těngo-Nu, dingangu abe pěngal᷊ạ rohkẹ̌ʼU susi e wọu anuku.

¹⁴Saụko apal᷊uasẹ̌ iạ e kahiang kasasal᷊amatẹ̌ bọu anu-Nu e, gěllirengkon naungu matuhụ si Kau e iạ.

¹⁵Tangu iạ e sarung maněntirong manga tita-Nu su taumata waradosa e, tadeạu i sire mẹ̌sul᷊e si Kau.

¹⁶Ambangeko iạ bọu papate, o Mawu Ruata mananal᷊amatẹ̌ku,[29] tangu ringangu mal᷊uasẹ̌ sarung takụ habareng kạadilʼU.

¹⁷O MAWU, tul᷊ungko iạ mẹ̌bisara, tangu iạ sarung mẹ̌dalo si Kau.

¹⁸I Kau e tawe lumaalong sasěmba pẹ̌potokang; manga andene iạ maněmbang sasěmba tẹ̌tutungang, i Kau e tawẹ kapulune.

¹⁹Sasěmba waugu Ruata ute kawe naung kụ nal᷊ahěmpung, naung kụ sụsasimpěllọ dingangu mẹ̌tobatẹ̌ e tawe sasuhudangʼU.

²⁰O Mawu Ruata, apasiloko kapia-Nu e su Sion, koạko kapia manga těndạu Yerusalem.

²¹Tangu i Kau e sarung mapulu měnarimạu sasěmba kụ mẹ̌tatal᷊ahino, sasěmba tẹ̌tongkateng dingangu sasěmba kụ tạ gainge sapi esẹ sarung isěmba su wowom panananěmbaěngʼU.