Read Sangir MAZMURẸ̌ 54 Bible Online

MAZMURẸ̌ 54 - Sangir bible

MAZMURẸ̌ 54

¹Baugu měngangahạ kantarị. Kạpangobị e kěcapi. Kakantarị tatěntiron Daud,

² piạ e tau Zifi riměnta nẹ̌bera si Saul, ”I Daud kai mẹ̌kẹ̌kěmbuni su anung kami.”

³O Mawu Ruata ambangeko iạ e kahiang kawasa-Nu, onggotengkong kạadilẹ̌ e si siạ kahiang katoghasʼU.

⁴Daringiheko kakindoạku e, o Mawu Ruata, mal᷊owọko reng měnaung kal᷊awọu waweraku e.

⁵U Taumata raghị e mẹ̌pětị měngalo si siạ, taumata maobotẹ̌ e mapulu měmate si siạ, i sire tawe mẹ̌dian Duata e.

⁶Arawe Mawu Ruata e kawe mẹ̌tatul᷊ung si siạ e; MAWU e kai tumatatawangku e.

⁷I Sie sarung měhukungu rokạku ringangu karal᷊akisi sire hala e, ringangu mapakawinasan sire u i Sie kawe satia si siạ e.

⁸Dingangu karal᷊uasu naung takụ i sarakang sasěmba si Kau, dingangu makitarimakasẹ̌ si Kau ual᷊ingu i Kau e kawe mapia, o MAWU.

⁹I Kau e seng naměllọu iạ e wọu kal᷊awọu kasasěsẹ, dingangu kinasiloku e rokạku kinawatạ.