Read Sangir MAZMURẸ̌ 55 Bible Online

MAZMURẸ̌ 55 - Sangir bible

MAZMURẸ̌ 55

¹Baugu měngangahạ kantarị. Piạ nalange kěcapi. Kakantarị tatěntiron Daud.

²O Ruata, daringiheko kakal᷊iomanengku, kụ abe pẹ̌bihu wọu kakindoạku e.

³Nẹ̌naunge wue iạ dingangu simbahe wue iạ, iạ e napěpohẹ̌ ual᷊ingu susan naungku e.

⁴Naungku e kal᷊inso kahiam papatakụ u rokạ dingangu pěnanědạu taumata ral᷊akisẹ̌ e. Batụu i sire e napakasusam pẹ̌bawiahẹ̌ku e, ore lai ringangu wawal᷊uang simědụ siạ e.

⁵Naungku e měngkai apa kal᷊indasa, u kawawintogu papate e měngkai tụtanung batangengku.

⁶Iạ e tẹ̌tal᷊iwungangu kawawintogẹ̌ dingangu katatakụ, kẹ̌kěngkunangu pěndangu makạtatakụ.

⁷U kawe manga iạ e piạ papanidẹ̌ku kere manga paluma tangu, iạ e sarung tuměllạ mědeạ tampạ kụ mal᷊ěmpị.

⁸Ore, iạ sarung tuměllạ pakarau-rau, kụ matanạ su wanua l᷊inggi.

⁹Iạ sarung mẹ̌dariahi mẹ̌deạ tampạ pẹ̌kěllungang bọu suwu-suwu ringangu rěllang maihạ.

¹⁰O MAWU, apẹ̌tal᷊ạbingọko manga rokạku e, apẹ̌kal᷊emboghangko pal᷊ahumbisaran sire e, u su soa e seng kinasiloku katatingkaị dingangu pẹ̌kakakoka e.

¹¹Ěllo hěbi i sire mělẹ̌likụ, i sire mẹ̌kẹ̌koạ dal᷊akisẹ̌ dingangu mẹ̌mahěta ghanohạ.

¹²Su apan tampạ piạ pěnggaghagholọ; pěnanědạ dingangu pěngangakal᷊ẹ̌ nẹ̌dahenesang su pasarẹ̌.

¹³Manga andene sědụ e měheghesẹ̌ si siạ, ute iạ e wědambem makakědang. Kai manga andene rumarokạ e měhinakang si siạ, iạ e wẹ̌dambeng makapẹ̌kěmbuni wọi sie.

¹⁴Arawe i kau e kai nạung dingangku, hapịku, hapị karẹ̌duhange kụ měndal᷊akị si siạ.

¹⁵Tempo kal᷊imona e i kitẹ e mẹ̌dẹ̌dal᷊ahapị be mapia, kụ biasa we měkal᷊iomaneng sěngkapẹ̌kal᷊iomaneng su Wal᷊em MAWU e.

¹⁶Balạete rumarokạku e mate sěngkarial᷊ẹ̌ dingangu maningbe wědang piạ singongone sumuẹ̌ sarang tampạu taumata nate e, batụu karal᷊akisẹ̌ e ene su wal᷊en sire, su tal᷊oaran sire e.

¹⁷Arawe iạ e mẹ̌kẹ̌kui Ruata, MAWU kụ sarung měngambang si siạ e.

¹⁸Ěllo hěbi e iạ dụdal᷊umpasiang dingangu sụsangị, dingangu i Sie e makạdingihẹ̌ tingihẹ̌ku.

¹⁹I Sie něngambang si siạ e wọu pěngangalon dumarokạ e, kụ měmpẹ̌gẹ̌gihingang dumokạ si siạ e.

²⁰Duata kụ mẹ̌pẹ̌parenta wọu kakalẹ̌ e sarung makaringihẹ̌ si siạ dingangu měmatạ si sire. Batụu i sire e mạdiri mẹ̌tobatẹ̌, dingangu tawe matatakụ u Ruata.

²¹L᷊ěnạu nạung hapịku e něngalo manga hapị e, i sie timal᷊ikudẹ̌ diandine.

²²Kal᷊awọu manga wawerane e al᷊usẹ̌ mạmitaugẹ̌, kai arawe su ral᷊ungu naunge piạ kawawěnsing. Bisarane masikome-sikome, katewe kawe měnẹ̌nusụ kere pisọ mahoro.

²³Sarakangke kaghaghěnggangu e su MAWU, tangu i Sie sarung měnuilẹ̌ si kau; u taumata matul᷊idẹ̌ e tawe i wala-Ne pakawatạ.

²⁴Arawe i Kau e, Mawu sarung měmunsal᷊i sire su ral᷊ungu lohange karal᷊ungange. Apan tahakontiang dingangu tahapanědọ daha e sarung tawe makakaratingu maloarang umuri sire e. Arawe iạ e mangimang si Kau.