Read Sangir MAZMURẸ̌ 58 Bible Online

MAZMURẸ̌ 58 - Sangir bible

MAZMURẸ̌ 58

¹Baugu měngangahạ kantarị. Tuhụ lagung: Kumbahang mẹ̌gagholọu. Mazmuri Daud.

²Ei kal᷊awọu měngangawasa,[30] adilẹ̌ bue putusangu? Matul᷊idẹ̌ bue i kamene su tempong něhukung taumata ho?

³Tala, i kamene kai piạ ol᷊ange ral᷊akị, dingangu mẹ̌koạ kal᷊ahěgisẹ̌ su wanua ini.

⁴Taumata ral᷊akisẹ̌ e seng napal᷊idẹ̌ deng dokeng bọu gandongang i sire seng něngakal᷊ẹ̌ deng dokeng piněhěnding.

⁵I sire piạ darotine kere těmpu mawawisa, ringangu mạněnsing tul᷊ine kere kobra wengelẹ̌ sěmbua

⁶kụ tawe makararingihẹ̌ tingihu mapapanden tahatariang, arau tingihu masasingkạ u lahopa.

⁷O Mawu Ruata, pẹ̌papědiko manga isin sire, ěbụko ual᷊ang manga singa kawuhuang ene e, MAWU.

⁸Balạete i sire pakaghěngging kere singangung akẹ, kere horong papitị kụ seng mal᷊umu.

⁹Balạete i sire kere puhětị kụ nelehẹ̌ kere rul᷊o, kere rariọ kạdodọ kụ nate reng ta nakạsilo tualagẹ̌.

¹⁰Bědang tawe nẹ̌tẹ̌tobatẹ̌ e i sire seng nawinasa, mẹ̌sul᷊ungu sumpinị deng melong deng tawẹ nạsaria nasue nitěllạu anging, tabidạu ene kawe sasuang mahěgu.

¹¹Nakasilo taumata ral᷊akisẹ̌ e nihukung, taumata matul᷊idẹ̌ e limuasẹ̌, dingangu nanguhasẹ̌ laẹde su rahan taumata duruhaka.

¹²Taumata e sarung mẹ̌berau, ”Mamben těngadẹ̌ taumata mapia e makahombang bawal᷊ise, těngadẹ̌, piạ Duata kụ mělahukung su dunia e.”