Read Sangir MAZMURẸ̌ 59 Bible Online

MAZMURẸ̌ 59 - Sangir bible

MAZMURẸ̌ 59

¹ Baugu měngangahạ kantarị. Tuhụ lagung: Kumbahang mẹ̌gagholọu. Mazmuri Daud, su tempong i Saul něndolohu taumata apẹ̌pahimang si sie su wal᷊ene mẹ̌deạu měmate si sie.

²O Ruataku, ambangeko iạ bọu manga rumarokạku, těntanureko iạ bọu taumata kụ měngalo si siạ.

³Lěsọko iạ bọu taumata kụ mẹ̌koạ dal᷊akisẹ̌ e, liwirẹ̌ko iạ e wọu kal᷊awọu manga tahapate.

⁴Kakěllạ e i sire němpẹ̌těgạ měmate si siạ, taumata apang matatingkaị e němpẹ̌komol᷊ẹ̌ dumokạ si siạ, sumbal᷊iau i sire e wal᷊inewe ual᷊ingu iạ seng nẹ̌dosa arau nẹ̌koạ pẹ̌sasal᷊a, MAWU.

⁵Bal᷊inewe lai ual᷊ingu sal᷊aku, i sire němpẹ̌bal᷊ikěkasẹ̌ dingangu němpẹ̌dariahi.

⁶Pẹ̌bangungke o Ruata Limembong Karangetange, tul᷊ungko iạ. O Ruatang Israel, pěnahidị e hala. Pẹ̌bangungke kụ pěhukung manga wansa, kụ kumbahangbe tumal᷊ěntụu taumata ral᷊akisẹ̌ kụ timal᷊ikudẹ̌ e.

⁷Su tempom bawěllo e i sire saụ kapia, sụsal᷊indoro kere asu kapělẹ̌likụ e soa.

⁸Kụ i sire měngkai hanesẹ̌ měnẹ̌nindirẹ̌ dingangu mělẹ̌hinakang; kal᷊awọu waweran sire e mahoro kere peda, katihokang i sire e kai tawẹ u makararingihẹ̌.

⁹Kaiso i Kau e rụl᷊ěgen sire MAWU kal᷊awọu wansa ene lẹ̌heghesangʼU.

¹⁰Seng i Kau e katoghasẹ̌ku, kụ iạ e mělẹ̌harapẹ̌ si Kau, i Kau e tampạu tatal᷊angengku, Mawu.

¹¹Ual᷊ingu kapia-Ne Ruataku e riměnta su anuku, i Sie napakawalang iạ e makasilo rumarokạku e kinawatạ.

¹²Kumbahang měmate si sire MAWU, tadeạu wansaku e tawe miwul᷊e. Apẹ̌sal᷊iawuhẹ̌ko i sire kahiang kawasa-Nu, o MAWU měnanirung si kami.

¹³U i sire e nẹ̌dosa ringangu manga waweran sire e; balạete i sire pakasedẹ su oboti sire, ual᷊ingu i sire e puluang měngane ringangu mẹ̌konti.

¹⁴Pěminasako si sire su ral᷊ungu ral᷊angehʼU, Mawu, pěminasako si sire e sarang masue. Tangu apan taumata kụ masingkạu Ruata e kawe mẹ̌pẹ̌parenta Israel, dingangu kararatuangʼE naěmpahẹ̌ sarang kasěllahu dunia e.

¹⁵Su tempong bawěllo e i sire kapia, sụsal᷊indoro kere asu kapělẹ̌likụ e soa.

¹⁶I sire mẹ̌pẹ̌palilị mẹ̌dẹ̌deạ kaěng, dingangu lụhěbu kereu tawe mal᷊aedẹ̌.

¹⁷Kaiso iạ e mẹ̌kẹ̌kantarị mạanung katoghasʼU; apang kamal᷊ukadẹ̌ e iạ mẹ̌kẹ̌kantarị maihạ mạanung kakěndagẹ̌ dingangu kasatianʼU. U seng i Kau e tampạu tatal᷊angengku, tampạku mẹ̌těngkal᷊indung su tempon susa e.

¹⁸O Mawu, katoghasẹ̌ku e, takụ kantarikangu raralo e i Kau, u kawe i Kau e tampạu pẹ̌sasirungangku, o Mawu Ruata i kẹ̌kěndagẹ̌ku e.