Read Sangir MAZMURẸ̌ 62 Bible Online

MAZMURẸ̌ 62 - Sangir bible

MAZMURẸ̌ 62

¹Baugu měngangahạ kantarị: Tumuhụ Yedutun. Mazmuri Daud.

²Dingangu mal᷊enehẹ̌ himukudẹ̌ku e měngẹ̌ngampal᷊ẹ̌ Duata, bọi Sie samatang kasasal᷊amatẹ̌ku e.

³Kětạeng i Sie mạněntanudẹ̌ dingangu mạngambang si siạ e, i Sie tumatatawangku, iạ e tawe mẹ̌kapura.

⁴Sarang tempo sude i kamene kěbị e mapulu měngalo sěngkatau kụ seng kere rarěndung kụ soha ringangu meselẹ̌ maraning mal᷊engge?

⁵I kamene tumbạeng piạ ol᷊angu mapakanawon sie wọu kal᷊aianenge marangẹ. I kamene e mapulu mẹ̌konti; ringangu mohong i kamene měngal᷊amatẹ̌, kaiso su ral᷊ungu naung i kamene e měngane.

⁶Dingangu mal᷊uasẹ̌ himukudẹ̌ku e mạngampal᷊ẹ̌ Duata, kụ bọi Sie samatang kasasal᷊amatẹ̌ku.

⁷Kětạeng i Sie kụ mạněntanudẹ̌ dingangu mạngambang si siạ e; i Sie e tumatatawangku, iạ e tawe mẹ̌kapura.

⁸Seng i Sie e Ruata kụ měngẹ̌ngonggọu kasasal᷊amatẹ̌ dingangu kal᷊aadatẹ̌ e si siạ, seng i Sie e měnanirungku ringangu tumatatawangku e matoghasẹ̌.

⁹Ei wansaku, pěharapẹ̌ko su Mawu Ruata e sěntiniạ tempo; běmbingko ral᷊ungu naungu e si Sie, u kai seng i Sie tampạ pẹ̌sasirungang i kitẹ e.

¹⁰Taumata e tumbạeng singongo sěngkasindạ, gaghuwạ darodọ lawọ tawẹ arěgane. Kereu i sire i timbang, nal᷊ahẹ u mambeng mahaěng, něngalembong kahaěnge wọu singongo sěngkasindạ.

¹¹Abe pěharapẹ̌ ual᷊ing pěmaměha, dingangu abe pěngumbala su apal᷊iwụ pul᷊aho. Kerene lai kamagengu kakakalạ u e kakạtambane, kumbahangbe naungu e mẹ̌těnděkạ sene.

¹²Měngkate apa pira sul᷊e iạ e makạdingihẹ̌ Duata e mělẹ̌hengetang u kawasa e kai wọi Sie rarěnta-Ne,

¹³ ringangu kawe i Sie tatapẹ̌be kụkěndagẹ̌. I Kau e MAWU, mạmal᷊isẹ̌ apan taumata tuhụ kakanoạ e.