Read Sangir MAZMURẸ̌ 63 Bible Online

MAZMURẸ̌ 63 - Sangir bible

MAZMURẸ̌ 63

¹ Mazmuri Daud, piạ i sie ene su wanua l᷊ingging Yehuda.

²O Ruata, i Kau e Ruataku, takụ dẹ̌deakeng dingangu i pẹ̌kẹ̌karalọ i Kau e. Mẹ̌sul᷊ungu ěntana kasahẹ̌ naroung akẹ, kerene iạ e naroung Kau.

³Balạe kere iạ e měmanda si Kau su Wal᷊e-Nu, dingangu makasilo katoghasẹ̌ ore lai kawawantugʼU e.

⁴KakěndagʼU e limembong kaarẹ̌gane wọu pẹ̌bawiahẹ̌, ual᷊ingu ene iạ e mẹ̌dalo si Kau.

⁵Kanandum pẹ̌bawiahẹ̌ku iạ e makitarimakasẹ si Kau; takụ hengketang takiahẹ̌ku e apidu kapẹ̌kal᷊iomanenge.

⁶Takụ daloěng i Kau e kapẹ̌gẹ̌gionen dal᷊uasẹ̌ e, u i Kau e nakawatụbe kapulung himukudẹ̌ku e mẹ̌sul᷊ungu kaěng masasědapẹ̌.

⁷Su tempong kạdal᷊okane su katatikilang e, i Kau e takụ katahěndungang; kanandung hěbi e iạ mẹ̌sẹ̌sipiri Kau,

⁸u seng i Kau e nẹ̌tul᷊ungu iạ; su al᷊ungu ěllungu papanidʼU e iạ mẹ̌kẹ̌kantarị lụl᷊uasẹ̌.

⁹Takụ hěgoěng i Kau pakasěga-sěgadẹ̌, lima-Nu e měnẹ̌nuilẹ̌ siạ.

¹⁰Arawe apan taumata kụ mapulu měmate si siạ e sarung duměsung sol᷊ong dunian tau nate.

¹¹I sire sarung mate su pẹ̌seketang, dingangu makoạ kinạu binatang dul᷊u.

¹²Datu e sarung lumuasẹ̌ ual᷊ingu tul᷊umangu Ruata; taumata kụ mẹ̌salu su arengu Ruata e sarung lụl᷊esạ, mohongu tahakontiang e sarung sěnsingang.