Read Sangir MAZMURẸ̌ 64 Bible Online

MAZMURẸ̌ 64 - Sangir bible

MAZMURẸ̌ 64

¹Baugu měngangahạ kantarị. Mazmuri Daud.

²O Ruata, daringihẹ̌ko kakal᷊iomanengku su tempong iạ mạsusa, ambangeko himukudẹ̌ku e wọu rumarokạ makạtatakụ e.

³Těntanure wue iạ e wọu ghapaěngu taumata duruhaka, bọu karakin tondol᷊ikụu taumata ral᷊akisẹ̌ e.

⁴I sire napakahoron lilan sire kere peda, měluang baweran sire mahasa kere papitị.

⁵I sire mẹ̌kẹ̌kakekeng běke konti wọu tampạu pẹ̌kakěmbuniang i sire, tawẹ kạdiongeng takụ i sire měndal᷊akisẹ̌ taumata tạ sal᷊ane.

⁶I sire mạngumpaedẹ̌ masěgadẹ̌ su niati sire ral᷊akisẹ̌ e, ringangu mẹ̌gẹ̌gaghighilu mẹ̌taing sedẹ; kụ katihokang i sire e kai tawẹ u nakạsilo.

⁷I sire e piạ nẹ̌kati sire ral᷊akisẹ̌ e kụ nẹ̌bera, ”I kami e mẹ̌dẹ̌dal᷊ahingidu karaki marěma-rěmasẹ̌.” Dal᷊ungu naung dingangu ěndumangu taumata e kai tumainịu maral᷊ung, kụ tawẹu makasẹ̌sui.

⁸Arawe Mawu Ruata e něngěnạu papitịʼE si sire, kụ sěngkělěndịu i sire e něngkal᷊esẹ.

⁹I sire e něngkawinasa ual᷊ingu waweran sire hala; kěbị apang nakasilo tangu němpẹ̌kilingu těmbọ i sire.

¹⁰Bọu ene kěbị taumata e sarung měngkatakụ; i sire mẹ̌sẹ̌sipiru karadiahangu Mawu Ruata, dingangu mělẹ̌habaru apang kụ seng nịkakoạʼE.

¹¹Tangu kěbị taumata mapia e sarung mahul᷊uasẹ̌ ual᷊ingu apang kụ seng kinoạu MAWU e. I sire e sarung mẹ̌těngkal᷊indung si Sie; kal᷊awọu taumata apang matul᷊idẹ̌ e sarung mahul᷊iagẹ̌.