Read Sangir MAZMURẸ̌ 65 Bible Online

MAZMURẸ̌ 65 - Sangir bible

MAZMURẸ̌ 65

¹Baugu měngangahạ kantarị. Mazmuri Daud. Kakantarị.

²Hinone wue i kami e mẹ̌dalo si Kau su Sion, Mawu, ringangu mapakasěhụu kědong kami e si Kau.

³U kai i Kau e seng dimaringihẹ̌ kakal᷊iomaneng i kami; kal᷊awọu taumata seng diměnta su anu-Nu ual᷊ingu seng nẹ̌dosa.

⁴Kal᷊awọu rosaku tumanịu nakawěhạ si siạ e, kaiso i Kau e mang nangampung u ene.

⁵Kariangkamang taumata apang pinile-Nu e ringangu nikuiangʼU mẹ̌deạu matanạ su Wal᷊e-Nu. I kami e sarung mawul᷊ugu kal᷊awọu apang mapia e su Wal᷊e-Nu, katatanakengʼU susi.

⁶I Kau e simimbahẹ̌ si kami ringangu něngonggọ si kami e kal᷊auntu, kinoạʼU kal᷊awọu apang makạdal᷊inaụ baugu mapakasal᷊amati kami! I kau e pělẹ̌harapeng u patikụ bansa sarang taghal᷊oang kụ marau e.

⁷Dingangu katoghasʼU e pinakatei-Nu e kal᷊awọu manga wul᷊ude, waugu mapakal᷊ahẹu kawasa-Nu e pěrkasa.

⁸Pinakal᷊ěda-Nu e ghal᷊ědụu taghal᷊oang dingangu wuntirisu luạ, ringangu pinakal᷊enehu e ghanohạ u manga wansa e.

⁹Kal᷊awọu tumanạu wanua e něngkatakụ dingangu němpěngadatẹ̌ nakasilo kal᷊awọu kakanoạʼU e masaria. Kasěllahu runia e wọu pondol᷊e sarang pondol᷊e pinakariadi-Nu němpẹ̌gio nahul᷊uasẹ̌.

¹⁰Ěntana ene nipadul᷊iangʼU ringangu nionggotangʼU e tahiti. Pinakatawa-Nu e kụ hasile tangu mědẹ̌dal᷊embo. Apan sal᷊ụ e pinakapenẹu akẹ kareạʼU, Niriahi-Nu e gandung baugi sire, o, kawe kerene i Kau e něnạdiang ene e.

¹¹I Kau e napakahuakẹ u songem bajake ringangu pinakaholo-Nu e manga kompelu ěntanane. I Kau e napakasikomeng ěntana ene ringangu akẹ u tahiti, ringangu pinakariadinu e manga hětị e timuwo matendang.

¹²Ual᷊ingu kapia-Nu e, apan taung e rẹ̌diahiangu e manga pěnsạ e; su apang i Kau e riměnta, ute piạ e pẹ̌daral᷊embo.

¹³Banua l᷊inggi e napenẹ u kambing domba, kal᷊awọu wukide e němpahul᷊iagẹ̌.

¹⁴Manga wimbaengu rěmpugẹ̌ e mẹ̌pẹ̌papul᷊awengu domba, manga wal᷊ane napenẹ u gandung. Patikụ e němpẹ̌gio kụ němpẹ̌kantarị dingangu ral᷊uasẹ̌.