Read Sangir MAZMURẸ̌ 66 Bible Online

MAZMURẸ̌ 66 - Sangir bible

MAZMURẸ̌ 66

¹Baugu měngangahạ kantarị. Kakantarị sěmbua. Pěmpahul᷊uase waugu Ruata, ei kasěllahu dunia!

²Pẹ̌kantarị e ringangu wantugeko arengʼE, bantugeko i Sie ringangu manga raralo.

³Pẹ̌berako su Mawu Ruata, ”Mamben těngadẹ̌ makạdal᷊inaụ kakanoạʼU e! Sědụ e nẹ̌samal᷊ẹ si Kau su katatakụ marasai, u apạ e masěllahẹ̌ kawasa-Nu.

⁴Kasěllahu runia e nẹ̌tumpěkuhẹ̌ maněmba si Kau e, i sire e mẹ̌kẹ̌kantarị mẹ̌dẹ̌dalo arengʼU.”

⁵Děntako ringangu kakěllaiko kakanoạu Ruata, mambeng makạdal᷊inaụ kal᷊awọu munara-Ne su tal᷊oaran taumata!

⁶ Laudẹ̌ e niwal᷊ui-Ne nakoạ ěntana mamara, i upung i kami e limiu kụ naolong laedẹ̌. Tangu i kami e limuasu kakanoạʼE.

⁷I Sie nẹ̌parenta ringangu mahasa sarang marěngụ-děngụ. Manga wansa e tẹ̌titikangʼE, tadeạu měnggaghohaeng e tawe makapangobotẹ̌ su těngo-Ne.

⁸Pẹ̌daloko Ruatang kami, ei manga wansa, apararingihẹ̌ko raralonu si Sie!

⁹I Sie seng něndiagạ si kami tadeạu i kami e těbewe wiahẹ̌, dingangu tawe mapakawalang kami e manawo.

¹⁰O Ruata, i Kau e seng němanikạ si kami mẹ̌sul᷊ungu taumata e namurẹ̌si sal᷊aka su ral᷊ungu putung.

¹¹Niwala-Nu e i kami pinakanawo su ral᷊ungu sedẹ, nighěllirangu e wawaěng mawěhạ tạ sihinge.

¹²Niwala-Nu e i kami pinakitatahidai su sědụ; i kami e limiu lěba ringangu putung. Kai orasẹ̌ ini e i kami seng niwawa-Nu sarang tampạ kụ nasukụ.

¹³Iạ e sarung mẹ̌bawa sasěmba tẹ̌tongkateng sol᷊ong Bal᷊e-Nu ringangu mapakasěhụu riandiku e si Kau;

¹⁴diandi kụ nạung takụ niwera e su tempong iạ su ral᷊ungu kasasusa.

¹⁵Takụ i sěmba si Kau e sasěmba tinongkạ e wọu binatang pile, kambing domba arau sapi esẹ, kụ tipune tụtiowol᷊ẹ̌ sarang langị.

¹⁶Děntạ e ringangu raringihẹ̌ko, ei patikụ taumata apang mạngimang e, sarung takụ běkeěng apang kụ kinoạu Ruata e si siạ.

¹⁷Iạ e seng kimakindoạu makịtul᷊ung si Sie; kụ ini e takụ kantarikang u raralo e waugi Sie.

¹⁸Mangawe iạ e mal᷊uasẹ̌ mẹ̌tiněnnang karal᷊akisẹ̌ e, nal᷊ahẹ u MAWU e mạdiri rumaringihẹ̌.

¹⁹Arawe Mawu Ruata e seng dimaringihẹ̌ si siạ, i Sie měnẹ̌naungbe kakindoạku.

²⁰Iạ e mẹ̌dalo Ruata watụ u i Sie tawe měnanuhudu kakal᷊iomanengku, ringangu tawe měngangědo kuměndagu iạ e.