Read Sangir MAZMURẸ̌ 67 Bible Online

MAZMURẸ̌ 67 - Sangir bible

MAZMURẸ̌ 67

¹Baugu měngangahạ kantarị. Piạ nalange kěcapi. Mazmurẹ̌.

²Karimạko Ruata e kuměndagẹ̌ dingangu měngal᷊amatẹ̌ si kitẹ. Karimạko i Sie kumakělla si kitẹ dingangu karal᷊ondo.

³O Mawu Ruata, mal᷊owọko kapulu-Nu e i kakiral᷊ang patikụ dunia e, ringangu kasasal᷊amatʼU e i lahẹ su tal᷊oaram patikụ bansa.

⁴Karimạko manga wansa e mẹ̌dalo si Kau, o Ruata, karimạko patikụ bansa e makitarimakasẹ si Kau.

⁵Karimạko patikụ bansa e mẹ̌gion dal᷊uasẹ̌, dingangu mẹ̌kantarị měmpahul᷊uasẹ̌. U i Kau e nẹ̌parenta ringangu adilẹ̌, dingangu něngahạ apam bansa e su dunia.

⁶Karimạko manga wansa e mẹ̌dalo si Kau e MAWU, karimạko patikụ bansa e makitarimakasẹ si Kau.

⁷Ěntana e seng nẹ̌gěllị u hasile, Duata, Ruatang kitẹ e seng něngal᷊amatẹ̌ si kitẹ.

⁸Duata seng něngal᷊amatẹ̌ si kitẹ e, karimạko i Sie adateng su kasěllahu dunia!