Read Sangir MAZMURẸ̌ 68 Bible Online

MAZMURẸ̌ 68 - Sangir bible

MAZMURẸ̌ 68

¹Baugu měngangahạ kantarị. Mazmuri Daud.

²Duata e napẹ̌kal᷊iaesu manga sekẹʼE, taumata kụ mẹ̌bẹ̌binsị i Sie němpẹ̌tal᷊ang bọu těngo-Ne.

³Duata e něnokol᷊i sire pinakapul᷊ẹ, kere tipu kụ nitiụ e ringangu nailang. Kere liling natuno su ral᷊ungu putung, kerene kakakoạu taumata ral᷊akisẹ̌ e maupu wọu těngon Duata.

⁴Arawe taumata maimang e rụl᷊uasẹ̌ dingangu rụl᷊iagẹ̌, i sire měmpẹ̌gẹ̌gion dal᷊uasẹ̌ su těngon Duata.

⁵Pěmpẹ̌kantarịko waugu Ruata, pẹ̌dalo arengʼE, diahiko ral᷊eng mal᷊oahẹ̌ baugi Sie kụ sụsake winawa. ArengʼE MAWU e — pěmpahul᷊uase su těngo-Ne!

⁶Duata kụ mạtanạ su Wal᷊e-Ne susi e kai i amangu manga rariọ kasisi ringangu tumatatawang apam bal᷊u e.

⁷Duata e něngonggọu katatanakeng baugu taumata kụ tụtal᷊iahu e; i Sie měliwiru taumata apang kạl᷊aaresẹ̌ hakịu i sire makapěndang masěnaěng. Arawe apan taumata kụ dụdokạ MAWU e harusẹ̌ matanạ su wanua kụ mamara-mara.

⁸O Ruata, piạ i Kau měngẹ̌ngahạ umatʼU dumal᷊eng lumiu wimbaenge linggi e,

⁹ dunia e ghimanuẹ̌, tahiti e rimasehẹ̌ su těngo-Nu, ual᷊ingu rarěntan Duatan Sinai,[32] Duatang Israel.

¹⁰I Kau e naparasehu tahiti e masuwenehẹ̌; dingangu napakahuakẹu ěntana-Nu kụ seng namara-mara.

¹¹Mase umatʼU e němpẹ̌tanạ paị sene; su ral᷊ungu kapia-Nu, Mawu, i Kau e něhiking taumata kasiang.

¹²MAWU e něngonggọu parenta, bọu e manga wawine němpẹ̌bawa habarẹ̌:

¹³”Manga ratu ringangu manga wuntuange sen timal᷊ang!” I sire timal᷊ang kere paluma kụ tamai timěllạ. Manga wawine su wal᷊e němpěmahiạu sal᷊aka ringangu wul᷊aeng nạung nitěntang. Maningbe mal᷊awọ kụ tawe timol᷊e nẹ̌sekẹ e, kaiso kawanuan Duata e seng nakahombang kal᷊auntu.

¹⁵Piạ e nạung MAWU Limembong Kawasa napẹ̌kal᷊iaesu manga ratu sene e, rimasehe saldu e wọu Wul᷊udu Salmon.

¹⁶Wul᷊udu Basan e kai wul᷊ude maraitẹ̌, wul᷊ude kụ piạ bongkone mal᷊awọ.

¹⁷Unụ e wọu wongkonu mal᷊awọ ene i kau e mạmanda piạ tanude, su Wul᷊udu Sion[33] kụ nipilen Duata waugu katatanakengʼE? MAWU e sarung matanạ paị sene sarang marěngụ-děngụ.

¹⁸Dingangu pul᷊one hiwune kareta matatoghasẹ̌ Duata e siměpụ su tal᷊oaran sire su ral᷊ungu kawawantugʼE.

¹⁹ MAWU e simaka sarang tampạ marangẹ; mal᷊awọ taumatan tawenge niwawa-Ne ringang. I Sie něnarimạ u sasěmba wọu tal᷊oaran taumata ore lai wọu tal᷊oaran tahapěngghohaeng; tadeạu matanạ sěngkapẹ̌tanạ dingangu MAWU Ruata.

²⁰Pẹ̌daloko MAWU, u kai i Sie e Ruata kụ nakasal᷊amatẹ̌ si kitẹ, bọu ěllo sarang ěllo i Sie němasaěng bawawaěng i kitẹ.

²¹Duatang kitẹ e kai MAWU kụ nakasal᷊amatẹ̌, i Sie něliwirẹ̌ si kitẹ e wọu papate.

²²Duata e mamben sarung měhěmpung těmbọu sědụʼE, apan taumata kụ měngkai mẹ̌bẹ̌biahẹ̌ su ral᷊ungu rosa.

²³Angkuěngu MAWU, ”Ei umatẹ̌-Ku, Takụ bawaěng sědụu e wọu Basan Takụ bawaěng i sire kapia wọu wal᷊an taghal᷊oang,

²⁴tadeạu i kamene měnguhasẹ̌ laedi kamene ringangu rahan sire, kụ manga asung kamene e měmpělanụ tuhụ kapulu.”

²⁵Kěbị e nakasilo pananodẹu wuntuangu watạʼU, Mawu Ruataku, Ratuku, i lẹ̌luhu sarang tampạ katatanakengʼE.

²⁶Su těngone apang mẹ̌kakantarị e měmpạhundal᷊eng, su l᷊ikudu měnanalang kěcapi; su tal᷊oarang manga mahuala měnanengkelẹ̌ arạbanạ; kụ kere ini e kakantarị i sire:

²⁷”Pẹ̌daloko Ruata e su tal᷊oarang komol᷊angu umatʼE, pẹ̌daloko MAWU, ei patikụ hěnton Yakub!”

²⁸Benyamin, hěnto kakạdodokange ghopol᷊e dụdal᷊eng su těngone, bọu ene apan těmbonangu Yehuda e mẹ̌gẹ̌gihingang su l᷊ikudu manga těmbonangu hěnton Zebulon dingangu i Naftali.

²⁹Duatanu e měnẹ̌nuntụ katoghasu; o Mawu, sẹ̌gadeko apan seng kinoạʼU e waugi kami.

³⁰Kal᷊awọ ratu e měmpẹ̌bawa sasěmban sire si Kau e su Wal᷊e-Nu e su Yerusalem.

³¹Hěkadeko Misirẹ̌ e, binatang dul᷊u ene su tal᷊oaran děmpugẹ̌ biahẹ̌ su akẹ e. Těntiroiko manga wansa e, ghapaěngu manga banteng dingangu kal᷊awọu anạe, měmpẹ̌tatahida sěmbaụ su wal᷊ine mědeạu makaěbạ sal᷊aka. Duata e napẹ̌kal᷊iaesu manga wansa kụ apang puluang měmpẹ̌sekẹ.

³²Apan těmbonangu Misirẹ̌ e riměnta měmpẹ̌bawa tambaga; tau Sudan e němpẹ̌bal᷊ikěkasẹ̌ měmpẹ̌bawa ghaghěllị su Mawu Ruata.

³³Pěmpẹ̌kantarịko waugu Ruata e, ei patikụ kararatuang, pěmpẹ̌kantarịkong kakantarị daralo waugu MAWU,

³⁴waugi sie kụ lụl᷊iu winangaengu tempo nạung tamai-tamai. Daringihẹ̌ko! MAWU e mẹ̌bisara, tingihʼE tangu ghimal᷊edụ maihạ-ihạ.

³⁵Akui wue tangu kawasan Duata e kụ tawe katatompol᷊ang baugu Israel, kawasa-Ne ene e mịdating sarang langị.

³⁶Mambeng makạdal᷊inaụ Duatang kitẹ e su tempong i Sie siměbang bọu tampạu katatanakengʼE. Duatang Israelẹ̌ e něngonggọu kawasa ringangu katoghasẹ̌ su manga umatʼE. Karaloko Ruata!