Read Sangir MAZMURẸ̌ 69 Bible Online

MAZMURẸ̌ 69 - Sangir bible

MAZMURẸ̌ 69

¹Baugu měngangahạ kantarị. Tumuhụ lagung: Bungangu Ghal᷊oghong. Bọi Daud.

²Ambangeko iạ e Mawu, u akẹ e seng naawị sarang lehẹku.

³Iạ e nawunsal᷊ẹ̌ su lěbo maral᷊ung, tawẹ apa tampạu tatahidaěngku. Iạ e nawul᷊usẹ̌ su akẹ maral᷊ung, nionodu wawěntal᷊u ohọ.

⁴Iạ e měngkate lụěnggo sarang narul᷊ěpe dingangu tinggol᷊angku e namara. Mataku e mạhěgeng pěngangampal᷊ẹ̌ laontol᷊u Mawuku e.

⁵ Taumata kụ mẹ̌bẹ̌binsị u iạ kụ tawẹ banggile e, limembong kal᷊awọ e wọu utạ su těmbọku. Taumata apam matatoghasẹ̌ e mapulu mapakawinasang iạ; i sire měngẹ̌ngalo si siạ e ringangu lahinakang. Iạ e sẹ̌sihasaěng apěnẹ̌nul᷊eng arětạ kụ tawe nihampasẹ̌ku.

⁶O Ruata, i Kau e masingkạ u manga sal᷊aku dosaku e tawe mawawuni si Kau e.

⁷Abe wala iạ e makakarěntan samedẹ̌ baugu apan taumata kụ mělẹ̌harapẹ̌ si Kau e, o MAWU, Ruata Kụ Limembong Makawasa. Abe wala iạ e makakarěntan samedẹ̌ su taumata apam měmpạněmba si Kau e, o Mawu Ruatang Israelẹ̌ e!

⁸Ual᷊ingu i Kau e iạ nihinakaneng, u ual᷊ingu i Kau e iạ niheghesang.

⁹Iạ e nakoạ kere taumata raghị baugu anạ u sěngkatauku, kere taumatang likude waugu manga tuhangku ringangu tuariku.

¹⁰ Katatoghasẹ̌ku e sụsahoka ual᷊ingu naungu e su Wal᷊e-Nu, sasamedu taumata kụ mělẹ̌hinakang si Kau e seng nihombang su watangengku.

¹¹Iạ e kụkiạ dingangu mẹ̌pẹ̌puhědang, arawe i sire měngkate mělẹ̌hinakang si siạ.

¹²Iạ e mělẹ̌luheng karong tatialang mělẹ̌lutu, arawe i sire e měmpạnindirẹ̌ si siạ.

¹³Iạ e nakoạ pal᷊ahumbisaran sire su tampạu pẹ̌kakomol᷊angu taumata e, ringangu kakantarịu tuamata wukang ute kai mạanung iạ e.

¹⁴Arawe iạ e měkẹ̌kal᷊iomaneng si Kau e MAWU, o Ruata, simbaheko iạ su tempone mapia e. Tul᷊ungko iạ e ual᷊ingu kakěndagʼU e masaria ringangu ual᷊ingu kasatianʼU.

¹⁵Abe wala iạ e mawul᷊usẹ̌ su ral᷊ungu lěbo, ambangeko iạ e wọu kal᷊awọu taumata kụ mẹ̌bẹ̌binsịu iạ e ringangu wọu akẹ kụ maral᷊ung.

¹⁶Abe wala iạ e ionodu wawěntal᷊u ohọ, dingangu mawul᷊usẹ̌ su wěnna arau i kubul᷊ẹ̌ su ral᷊ungu lohange.

¹⁷Simbaheko iạ e MAWU, u i Kau e mapia ringangu tatapẹ̌be kụkěndagẹ̌. Karimạko reng mẹ̌bihu si siạ u masaria e kakěndagʼU.

¹⁸Kumbahangbe mẹ̌kěmbuni wọu ěllangʼU ini e, u iạ e nikasusaěng, kụ pẹ̌bal᷊ikěkasẹ̌ko pẹ̌tul᷊ungu iạ e.

¹⁹Děntako pěngambang si siạ, kụ liwirẹ̌ko iạ e wọu manga rumarokạku.

²⁰I Kau e masingkạ u kereapa iạ e sẹ̌samedang, lẹ̌hinakaneng, dingangu tẹ̌tongkeaneng, i Kau e nakasilo kal᷊awọu sědụku.

²¹Lahinakang e seng nakakariading iạ e nanawo naungku, ringangu iạ e napěndụ naungku. Takụ dẹ̌dareakeng tatal᷊ěntụ e, kaiso mang sia-sia, takụ dẹ̌dareakeng lahiborẹ̌ e, kaiso mang tawe kaěbakengku.

²² Saranglai iạ e rẹ̌dotiang su kaěng; su tempong narou, iạ e ghẹ̌gelirangu haesẹ̌ baugu inumang.

²³ Balạete pal᷊ahungkaěng i sire e makakarěntan silakạ, dingangu makoạ sasamẹ baugu manga saken sire e.

²⁴Balạete matan sire e kawawutane ringangu likudi sire e hanesẹ̌ lome.

²⁵Tumpạ e kěbị dal᷊angehʼU e si sire, balạete i sire kahombangengu ral᷊angehʼU e mẹ̌dẹ̌daraẹ.

²⁶ Balạete pẹ̌darasengang i sire e lụhio, ringangu manga tentan sire e tawẹ taune.

²⁷U i sire e mẹ̌tetingkaị taumata apang ilẹ̌hukungʼU, ringangu mạhumbisaran taumata apang pẹ̌pahangengʼU.

²⁸Balạete sal᷊an sire e pahuntinambang kal᷊awọ e; kumbahangbe mapěhinon sire e.

²⁹ Balạete areng i sire e ěmukang bọu bukẹ̌ u taumata wiahẹ̌ e; ringangu tawe i wohẹ su rol᷊ẹ̌ u taumata matul᷊idẹ̌ e.

³⁰Arawe iạ e kẹ̌kasědạ dingangu mạsakị, hengkẹko iạ e Mawu ringangu ambangeko iạ e.

³¹Tangu iạ e sarung mẹ̌dalo Ruata ringangu kakantarị, měmantugẹ̌ si Sie ringangu kakantarịu tatarimakasẹ.

³²Ene e limembong nẹ̌tatal᷊ahino su MAWU sul᷊ungu sasěmba sapi, gaghěllị sapi esẹ kụ gẹ̌guwạ.

³³Nakasilo ene e taumata kẹ̌kasědạ e lụl᷊uasẹ̌, kụ taumata mạněmba Ruata e lụl᷊ahimpulu.

³⁴U MAWU e rụdaringihẹ̌ taumata kasiange; i Sie měngkai tụtatingang manga ěllangʼE su ral᷊ungu tahungkụ.

³⁵Pẹ̌daloko Ruata, ei langị dingangu dunia, taghal᷊oang dingangu patikụ diadikang su ral᷊unge.

³⁶I Sie sarung mapakasal᷊amatu Yerusalem dingangu měmangung kapia manga soan Yehuda. Umatu MAWU e sarung mẹ̌tanạ paị sene; ěntana ene nakoạ tataghuaneng i sire.

³⁷Manga anạ pulunge sarung kapusakatenge; ringangu taumata apang kụkěndagu MAWU e sarung makapẹ̌tanạ sene.