Read Sangir MAZMURẸ̌ 7 Bible Online

MAZMURẸ̌ 7 - Sangir bible

MAZMURẸ̌ 7

¹Kakahiorọ i Daud kụ kẹ̌kantarikang baugu MAWU ual᷊ingu i Kus, tau Benyamin ene.

²O MAWU Ruataku, iạ e mẹ̌těngkal᷊indung si Kau; ambangeko ringangu pěllọko iạ e wọu patikụ taumata kụ mẹ̌nẹ̌nahusu si siạ e.

³I sire abe wala kere singa měněmbo ringangu měmol᷊eng si siạ e kụ tawẹ apa tul᷊umang si siạ e.

⁴O MAWU Ruataku, manga andene naungku e wengkọ, makoạ dal᷊akisẹ̌ e waugu hapị, arau mapakarugin dokạ tawẹ sěbapẹ̌ e,[5] manga andene iạ e mẹ̌koạ kerene,

⁶balạe kere iạ sahusuang dingangu samekangu sědụ, bọu e pateěng dingangu i wala su ěntana.

⁷Kasongkahe ral᷊angehʼU e MAWU, kụ seketẹ e kal᷊awọu sědụku. Hotede pẹ̌bangung pẹ̌tul᷊ungu iạ, u i Kau e měnẹ̌nuntụ kạadilẹ̌.

⁸Tampungko kal᷊awọu wansa e apělikụ si Kau e, ringangu pẹ̌kawasako si sire wọu kal᷊aianengʼU e su sorga.[6]

⁹I Kau e mělẹ̌hukung kal᷊awọu taumata, gěllirengkong kạadilẹ̌ e iạ, MAWU, u iạ e tawẹ sal᷊aku.

¹⁰ Ědoko karal᷊akisu taumata duruhaka e, dingangu toghaseko naungu taumata mapia e, u i Kau e kai Ruata kụ adilẹ̌, kụ nakakasingkạ dal᷊ungu naung dingangu tiněnnan taumata.

¹¹Měnanirungku e ute kai Ruata kụ mapakạsal᷊amatu taumata kụ naunge wurẹ̌si.

¹²Duata e kai mělahukung kụ adilẹ̌, kụ sěntiniạ mělẹ̌hukung taumata ral᷊akisẹ̌.

¹³Kereu kalakuang i sire e tawe mẹ̌bal᷊ui, ute i Sie e sadia ringangu aghidẹ̌ kụ makapate. I Sie něngasa peda-Ne ringangu nangěnạ naěnakengʼE, bọu ene něnarangu manga papitị e piạ putunge.

¹⁵Kakěllạe, taumata ral᷊akisẹ̌, mělẹ̌hingidu karal᷊akisẹ̌, i sie nẹ̌koạ karakine ral᷊akisẹ̌ dingangu mạngakal᷊ẹ̌.

¹⁶I sie měmẹ̌mangka lohange waugu taumata wal᷊ine, kaiso i sie sẹ̌sane nataho su ral᷊unge.

¹⁷Ual᷊ingu ene i sie nihukungu karal᷊akise hala, ringangu nasigěsạ u kakakětịu naunge hala.

¹⁸Iạ e makitarimakasẹ su MAWU u i Sie kai adilẹ̌, takụ kantarikangu raralo waugu MAWU, Karangetange.