Read Sangir MAZMURẸ̌ 71 Bible Online

MAZMURẸ̌ 71 - Sangir bible

MAZMURẸ̌ 71

¹Seng si Kau e iạ mẹ̌těngkal᷊indung MAWU, abe wala iạ e i pakamea.

²Liwirẹ̌ko iạ, u i Kau e adilẹ̌, daringiheko ringangu ambangeko iạ e.

³Kakoạko iạ e kere wul᷊udu watu tampạ u katatanakengku, kụ tiniạ e mal᷊owọ karatingangku. U i Kau e seng namutusẹ̌ baugu měngambang si siạ, i Kau e pẹ̌sasirungangku ringangu pẹ̌kakěllungangku.

⁴O Ruataku, liwirẹ̌ko iạ e wọu taumata ral᷊akisẹ̌, bọu kawasan taumata mahasa ringangu matingkaị.

⁵Batụu seng i Kau e pělẹ̌harapengku MAWU. MAWU, iạ e mangimang si Kau ren dokeng iạ mangudạ.

⁶Karěngụu pẹ̌bawiahẹ̌ku iạ e mạngunsarehẹ̌ si Kau; i Kau e mạngěllung si siạ [34] den dokeng iạ buhụ e piněhanạ tangu iạ e hanesẹ̌ mẹ̌dẹ̌dalo si Kau.

⁷Pẹ̌bawiahẹ̌ku e nakoạ sansahẹ̌ baugu taumata l᷊awọ e, U seng i Kau e pẹ̌sasirungangku e matoghasẹ̌.

⁸Iạ e sěntiniạ mẹ̌dẹ̌dalo si Kau, kanandung ěllo e takụ ilẹ̌habarẹ̌ e ute kawawantugʼU.

⁹Kumbahangbe i rěmmẹ iạ e su tempong kaghaghurangku abe těntang iạ kereu katoghasẹ̌ku e seng masue,

¹⁰u rumarokạku e mẹ̌bẹ̌bisarang iạ, taumata apang mapulu měmate si siạ e mẹ̌bẹ̌buntuang.

¹¹Angkuěng i sire, ”I sie seng nitěntang u Ruata; bọete sahusuang dingangu samekang i kitẹ e i sie, u tawẹ apa reng mapakasal᷊amati sie.”

¹²Kumbahangbe i Kau maraung iạ e Mawu, Ruataku, tul᷊ungko lighạ iạ e.

¹³Balạekere taumata apang měmpěngalo si siạ apakamea ringangu apakaupu. Balạekere taumata apang mapulu měnilakạ si siạ e pẹ̌bawingọ e ringangu likutangu karal᷊akiẹ̌ e.

¹⁴Arawe iạ e měngkate sěntiniạ mělẹ̌harapẹ̌ si Kau, ringangu mangkeng kakạl᷊awọe mẹ̌dẹ̌dalo si Kau.

¹⁵Kanandung ěllo e sarung takụ koateng běke mạanung kakanoạʼU adilẹ̌ e, ringangu kasasal᷊amatẹ̌ bọu anu-Nu e tawe i karekeng.

¹⁶Takụ daloěng kakakoạʼU wahani e o Mawu Ruata, takụ i pakasěsahẹ̌ kạadilʼU e, kạadilʼU e samatang.

¹⁷O Ruata, i Kau e naněntiro si siạ den dokeng iạ mangudạ, sarang orasẹ̌ ini e takụ nikoạ běke munara-Nu kụ makạdal᷊inaụ e.

¹⁸O Ruata abe pěněntangu iạ e, sarang iạ e maghurang dingangu měngowang, tadeạu iạ e mẹ̌běkeng kawasa ringangu kawahani-Nu e su patikụ pal᷊ahěnto e sarung.

¹⁹O Ruata, kạadilʼU e sěntarang langị karangẹ e; masěllahẹ̌ kakanoạʼU e; i sai wue makasul᷊ung si Kau e?

²⁰I Kau e nẹ̌gěllịu susa mal᷊awọ o kawe mawawěhạ, kaiso i Kau e sarung měngul᷊ị kapia toghasẹ̌ku e ringangu mapẹ̌bangungu iạ kapia wọu lěbing.

²¹I Kau e sarung mapakariading iạ e limembong adateng, dingangu měhiborẹ̌ lai si siạ.

²²Iạ e sarung mẹ̌pudi si Kau ringangu gambusẹ̌, batụu i Kau e satia, o Ruataku. Iạ e mapulu mẹ̌kantarị u raralo si Kau ringangu kěcapi, o Ruatang Israel susi e.

²³Iạ mẹ̌gio ringangu mẹ̌papinunụ u ral᷊uasẹ̌, kapẹ̌kẹ̌kantarịen daralo si Kau. Himukudẹ̌ ore lai wadangku e mẹ̌kẹ̌kantarị dingangu ral᷊uasẹ̌, u i Kau e seng něngambang si siạ.

²⁴Kanandung ěllo e takụbe sarung i wěke kạadilʼU e, watụ u taumata apang mapulu měnilakạ siạ e seng kinawatạ dingangu nitahumeang.