Read Sangir MAZMURẸ̌ 72 Bible Online

MAZMURẸ̌ 72 - Sangir bible

MAZMURẸ̌ 72

¹Bọi Salomo. O Ruata, těntiroko tita-Nu e su manga ratu, onggotengkong kạadilʼU e manga ahusu ratu e.

²Karimạko i sie e měhukung umatʼU e tuhụ tita e, ringangu miěbạ taumata ipẹ̌tẹ̌tahuěllange su kạadile.

³Karimạko wanuang kami e tawẹ konsange pẹ̌bawiahe ringangu matul᷊ende, ringangu piạ kạadilẹ̌ baugu patikụ bansa.

⁴Karimạko ratu e tumatawang hakẹ̌ u kawanua wiasa e, mẹ̌tul᷊ungu apan taumata kụ masusa e ringangu mapakawihuang kal᷊awọu apang měmpẹ̌tẹ̌tahuěllang i sire.

⁵Karimạko i sie e těbewe mẹ̌dẹ̌dararagẹ̌ bọu hěnto sarang hěnto karěngụewem piạ matangěllo ringangu wul᷊ang.

⁶Karimạko i sie e mẹ̌sul᷊ungu tahiti kụ dimasehẹ̌ su wimbaenge, mẹ̌sul᷊ungu tahiti masuwenehẹ̌ kụ něholo manga rahami.

⁷Mal᷊owọko kạadilẹ̌ e ěndaị sumombọ sarang marěngụ-děngụ, dingangu pẹ̌bawiahẹ̌ tạ konsange e ipẹ̌dẹ̌dal᷊embo karěngụ u wul᷊ang sụsendạ e.

⁸ Kararatuange sarung mawěnahẹ̌ bọu l᷊audẹ̌ sarang laudẹ̌, maěmpahẹ̌ bọu raki sarang sěmběkam bahẹ e.

⁹Tumanạu wanua l᷊inggi e sarung kumakoho si sie ringangu sědụ e mẹ̌tumpěkuhẹ̌ su těngon laede.

¹⁰Manga ratun Tarsis[35] dingangu manga tahanusa e sarung mẹ̌bawa manga sasěmba si sie. Manga ratung Arabẹ̌ dingangu Etiopia riměnta nẹ̌bawa ghaghěllị.

¹¹Patikụ datu e sarung mẹ̌tumpěkuhẹ̌ su těngone, kal᷊awọu wansa e nakoạ manga ěllange.

¹²Batụu i sie napakal᷊iun taumata ipẹ̌tẹ̌tahuěllang kụ tawe makakoạ apa-apa, ringangu taumata kasiang kụ kụkakindoạ si sie.

¹³Iạ e kụkěndagu taumata kasiang dingangu kawanua wiasa e, ore lai mapakasal᷊amatu pẹ̌bawiahu taumata kụ kasiang.

¹⁴I sie měliwiri sire wọu pẹ̌tatahuěllang e ringangu katatingkaị, u pẹ̌bawiahi sire e apạ e maarěga si sie.

¹⁵Biahẹ̌ e i tuan datu! Karimạko waugʼi sie rembeng i sěmba wul᷊aeng bọu wanuang Arabẹ̌ e. Karimạko i sie reng dẹ̌doaěng apan tempo e ringangu sěntiniạ deng lẹ̌al᷊amateng.

¹⁶Karimạko gandung e rembeng mẹ̌dẹ̌dal᷊embo su kasěllahu wanua, ringangu manga wukidẹ̌ e rembeng mapenẹu ghẹ̌sing ěntana e. Mal᷊owọko ěntana e reng matawa kere Wawul᷊urangu Libanon, dingangu tumanạ u soane mahuntinamba kere rěmpugẹ̌ su wimbaenge.

¹⁷Mal᷊owọko arengu ratu e tẹ̌tahěndungang sarang marěngụ-děngụ, dingangu telenge sahuneng mahuntinambang karěngụ u matangěllo e ene. Mal᷊owọko manga wansa e mẹ̌dorong al᷊amateng kere i sie, ringangu patikụ taumata e mẹ̌sẹ̌sěbạ i sie e mal᷊unsemahẹ̌.

¹⁸Karaloko MAWU e Ruatang Israel! Kětạeng i Sie e mẹ̌kẹ̌koạ kal᷊awọu munara kụ makạdal᷊inaụ e.

¹⁹Karaloko arengʼE kụ mawantugẹ̌ ene e sarang marěngụ-děngụ; karimạko kasěllahu dunia e napenẹ u kawantugʼE! Kakoạko kerene. Aming!

²⁰Sarang ini e manga kakal᷊iomaneng i Daud, anạ i Isai.