Read Sangir MAZMURẸ̌ 73 Bible Online

MAZMURẸ̌ 73 - Sangir bible

MAZMURẸ̌ 73

¹Mazmurʼi Asaf. Enẹ e kapiane Ruata e waugu umatʼE, waugu taumata kụ piạ naunge wurěsi.

²Arawe iạ e seng gụgěnggang, pangangumbalaku e seng masandigẹ̌ mailang,

³batụu iạ e mẹ̌tẹ̌tanudu taumata maobotẹ̌ e, piạ e iạ nakasilo kal᷊auntungu taumata ral᷊akisẹ̌ e.

⁴Batụu i sire tawe nakapěndang likibe, badang i sire e matoghasẹ̌ dingangu mahuweka.

⁵I sire e tawe měnananggung susa e tawe kinanawoěngu soe kere taumata wal᷊ine.

⁶Ual᷊ingu ene e i sire mạpasilong obotẹ̌, dingangu hanesẹ̌ mal᷊ahasa kakanoạ e.

⁷Bọu naung i sire e kẹ̌kawosoěngu karal᷊akisẹ̌ e;[36] i sire e měngkai tasibung kal᷊awọu karaki ral᷊akisẹ̌ e.

⁸I sire měmpělẹ̌langehẹ̌ dingangu měmpẹ̌pawera, maseko l᷊ai piạ oboti sire měmpẹ̌matakụ u měmpělinda.

⁹I sire němpěhodatẹ̌ Duata su sorga e, ringangu měmpẹ̌kẹ̌kotarila su kal᷊awọu taumata su dunia e,

¹⁰hakịu umatʼU Ruata e němpẹ̌bal᷊i sarang anun sire e,[37] dingangu nahimang su wisaran sire.

¹¹Angkuěng i sire, ”Duata e wěga wue, Karangetange tawe makaěnna.”

¹²Kerene kakakoạ u taumata ral᷊akisẹ̌ e, pẹ̌bawiahe mal᷊enehẹ̌, arětạ e mang kakạtambane.

¹³Tawẹ gunane iạ měndiagạ naungku e wurěsi; tawẹ gunane iạ e mẹ̌těngkaraun dosa.

¹⁴U kanandung ěllo e iạ kẹ̌kahombangengu soe; apam mal᷊ukadẹ̌ e iạ pẹ̌pahangeng.

¹⁵Kereu manga iạ mẹ̌bera kerene, iạ e mẹ̌tẹ̌tul᷊ang ghal᷊ipohong manga anạu.

¹⁶Arawe su tempong iạ e mẹ̌tẹ̌tawakal᷊i mẹ̌deạu makaěnna e, hal᷊ẹ̌ ene tangú enẹ e masigěsạ si siạ.

¹⁷Pěngěnsueěnge iạ sumuẹ̌ su Wal᷊en MAWU, tangú nakaěnnạ e iạ e kasueěngu taumata ral᷊akisẹ̌ e.

¹⁸Nipěllọu e i sire su ral᷊eng mal᷊ewehẹ̌, dingangu niwala-Nu e i sire nanawo su kawawinasa.

¹⁹Su ral᷊ungu sěngkakondạ i sire e mawihua, kụ enẹ e katědụ-tědụ e pẹ̌bawiahi sire e.

²⁰Mẹ̌sul᷊ungu ipi kụ nailang mal᷊ukadẹ̌ e; piạ i Kau e nẹ̌bangung MAWU, i sire apidu naghěngging.

²¹Piạ e iạ nakapěndang nẹ̌sasěsilẹ̌ dingangu naungku e mẹ̌sul᷊ungu nikasusụ,

²²iạ e wodo ringangu tawe nakaěnna, iạ e mẹ̌sul᷊ungu binatang su těngo-Nu.

²³Kaiso iạ e tatapẹ̌ su rěduhʼU, i Kau e mạngumbelẹ limaku e koaneng.

²⁴I Kau e něngahạ u iạ dingangu sasasa, ringangu itarimạʼU iạ e su adate sarung.

²⁵I sai tangu taghuanengku e su sorga sul᷊iung Kau e? Sul᷊iung Kau e tawẹ apa takụ ilẹ̌ěnning su dunia.

²⁶Manilaing himukudẹ̌ dingangu wadangku e nělome, kaiso mang i Kau e katoghasẹ̌ku e, o Ruataku; seng i Kau e kal᷊awọu tataghuanengku sarang marěngụ-děngụ.

²⁷Taumata kụ měněntang i Kau e sarung masilakạ, nipakawinasa-Nu e taumata kụ tawẹ satiane si Kau e.

²⁸Arawe waugu iạ e mambeng mapia ute ene su rěduhu Mawu Ruata, MAWU Ruata e takụ ipakariadi tampạu pẹ̌sasirungangku, tadeạu iạ makapěhabaru kal᷊awọu kakanoạʼE.