Read Sangir MAZMURẸ̌ 74 Bible Online

MAZMURẸ̌ 74 - Sangir bible

MAZMURẸ̌ 74

¹Kakantarị tatěntiron Asaf. O Ruata, sarang karěngụ e i těntangʼU e i kami? Unụ e i Kau e měngkai turusẹ̌ lụlangehẹ̌ su manga umatʼU hala e?

²Tahěndungeko umatʼU pinile-Nu e dokeng kal᷊imona, bansa kụ nạung niliwirʼU e tadeạu makoạ tataghuanengʼU. Tahěndunge wue Wukidu Sion e, nạung kinoạʼU e tampạu katatanakengʼU.

³Sẹ̌suieko tampạ kụ seng nakoạ ěnnạ e; kěbị e su Wal᷊e-Nu seng nịgaghoghahu sekẹ.

⁴Kal᷊awọu sekẹʼU e měmpěmẹ̌mansagẹ̌ su Wal᷊e-Nu, ringangu němpěmitingu manga wanehang nakawatạ e sene.

⁵I sire e mẹ̌sul᷊ungu měnanuwang kalu kụ mělẹ̌limbeng bal᷊iunge, waugu i pěnuwang manga kalu su kěhu e.

⁶Kal᷊awọu apal᷊iwụ bọu kalu niukirẹ̌ e nịkakakorọ i sire ringangu wal᷊iung arau wawanggo.

⁷I sire e němpěnutung Bal᷊e-Nu sarangkewe nasue nahěngisẹ̌; dingangu nakal᷊amuhụ tampạ u pěněmbaěng si Kau e.

⁸I sire e mapulu mapẹ̌samal᷊ẹ i kami e samatang, dingangu mapulu měmpanutung kěbị tampạ u pẹ̌kakal᷊iomanengang su wanua ini.

⁹Manga nabi e ringangu kal᷊awọu tanda makạdal᷊inaụ e semben tawẹ lai i kasasilo, ringangu tawẹ u sarang sěngkatau e lai masingkạ měnsang sarang kạděngụ e měngkai sěntiniạ kere ini.

¹⁰Sarang kạděngụ e sědụ e mẹ̌baheaung Kau e tangu? Sarang kạděngụ e i sire měhinakang arengʼU e tangu?

¹¹Unụ e i Kau e selain tawe mẹ̌tul᷊ung i kami?[38] Unụ e i Kau e selain tawe mẹ̌pandung si kami e?

¹²Dokem bọu tětạ e seng i Kau e ratuku, o Mawu! Seng i Kau e něngambang si kami.

¹³ Dingangu katoghasẹ̌ tawẹ sihinge i Kau e naměka laudẹ̌, dingangu něhěmpung těmbọu manga nagạ u laudẹ̌.

¹⁴ I Kau e nělahěmpung těmbọu manga Lewiatan dingangu napakariadin sie nakoạ kinạ u manga ral᷊ohom bimbaenge linggi e.

¹⁵I Kau e napaelehu simbul᷊u akẹ dingangu sal᷊ụ; sal᷊ụ gẹ̌guwạ e niapakal᷊ẹ̌sa-Nu.

¹⁶Seng i Kau e něndiadi ěllo ringangu hěbi, ore lai něnantu tampạu matangěllo ringangu wul᷊ang.

¹⁷I Kau e měnẹ̌nilakehu manga pẹ̌saraěngu dunia, napakariadiʼm musungu měhangu ringangu mẹ̌tahiti e.

¹⁸Pẹ̌tahěndungko kereapa sekẹ e něhinakang si Kau, MAWU, bansa wěgang Kau e něhodatẹ̌ arengʼU.

¹⁹Kumbahang měnarakang umatʼU ta makakoạ manga apa e su l᷊iman sekẹ kụ marangěngisẹ̌ e. Kumbahangbe miwul᷊eng pẹ̌bawiahu umatʼU kụ soe ene e sarang karěngụ e.

²⁰Pẹ̌tahěndungko riandi kụ nikědo-Nu e si kami, batụu taumata e mẹ̌kẹ̌koạ katatingkaị su apan tampạ su rěndunge su wanua ini.

²¹Kumbahang mapakawalang taumata sẹ̌sẹ̌dakeng e i pakamea, karimạko apan taumata masunsara ringangu kasiang e mẹ̌dalo si Kau.

²²Pẹ̌bangungko Mawu, tatawange wue pěrkara-Nu! U kanandung ěllo e i Kau tẹ̌tongkeaneng u kal᷊awọu taumata kụ tawe mangangimang si Kau.

²³Kumbahang miwul᷊eng apam bansagu manga sekẹʼU, ganohạu manga rumarokạʼU e mangkeng kakạihạ e!