Read Sangir MAZMURẸ̌ 75 Bible Online

MAZMURẸ̌ 75 - Sangir bible

MAZMURẸ̌ 75

¹Baugu měngangahạ kantarị. Tumuhụ lagung: Kumbahang mapakaupu. Mazmuri Asaf. Kakantarị.

²I kami e měněmba si Kau, Mawuʼ i kami e makitarimakasẹ si Kau ringangu měhabaru munara-Nu kụ makạdal᷊inaụ.

³Duata e něhengetang, ”Su tempo kụ seng Takụ nitantu e, Iạ e sarung měhukung su kạadile.

⁴Kereu dunia e ghumanuẹ̌ dingangu patikụ taumatane ute seng Iạ e manoghasẹ̌ kal᷊awọu manga rihine.”

⁵Baugu taumata kụ apang puluang měmpẹ̌taghunalangu mohong, Iạ e maul᷊ị tadeạu kumbahang delaing mẹ̌taghunalang u mohong.

⁶Kụ baugu taumata ral᷊akisẹ̌ e, tadeạu kumbahang delaing mẹ̌taingu obotẹ̌ e. Kumbahang lumesạ u watangeng arau maobotẹ̌ su wisarane.

⁷Batụu pělahukung e tawe ruměnta wọu sěmběkan daki arau wahẹ dingangu wal᷊inewe lai wọu sěmběkan sawěnahẹ̌ arau sěmběkan timuhẹ̌.[39]

⁸Kaiso Ruata sẹ̌sane mělahukunge, i Sie mapakasanạu sěngkatau ringangu mapakarangẹu wal᷊ine.

⁹Dal᷊angehu MAWU e mẹ̌sul᷊ungu bokorẹ̌ e su l᷊ima-Ne, bokorẹ̌ ene e lohong akẹ u anggorẹ̌ makětị. Duata e měměmbingu lohone, kal᷊awọu taumata ral᷊akisẹ̌ su dunia e harusẹ̌ měnginung ene e sarang masue.

¹⁰Arawe iạ e sarung těbe mẹ̌dal᷊ahabaru Ruatan Yakub, mẹ̌kantarị u manga raralo si Sie.

¹¹I Sie sarung měmamekohẹ̌ katoghasu taumata ral᷊akisẹ̌, arawe taumata mapia e mangkeng kạkatoghase.