Read Sangir MAZMURẸ̌ 77 Bible Online

MAZMURẸ̌ 77 - Sangir bible

MAZMURẸ̌ 77

¹Baugu měngangahạ kantarị. Tumuhụ: Yedutun. Mazmuri Asaf.

²Iạ e kụkui Mawu Ruata, ringangu tingihẹ̌ku e maihạ; iạ e kụkui Mawu Ruata, ringangu tingihẹ̌ku e maihạ, kụ i Sie rimaringihẹ̌ si siạ.

³Su tempong kasasěsẹ e iạ mẹ̌kẹ̌kal᷊iomaneng su MAWU, kanandung hěbi e takụ lẹ̌hengketang takiahẹ̌ku e sol᷊ong anun Sie tawe mawawoehẹ̌, kaiso naungku e mambem mạdiri liwuhang.

⁴Mạengu iạ e makatahěndung Duata e, iạ mẹ̌pangaduhang, mạengu iạ e mẹ̌sipirẹ̌, naungku e mangkeng kạkaěnsune.

⁵MAWU e mambeng nakal᷊anggang si siạ su tempong hěbi, iạ e kal᷊indasa hakịu tawe makawera.

⁶Tẹ̌tiněnnaěngku e kal᷊awọu ěllo napaghohẹ̌ e, tẹ̌tatahěndungangku ringangu sẹ̌sipirangku apan taung nal᷊iu.

⁷Su tempong hěbi e iạ mang kạpẹ̌tẹ̌tiněnnane, ringangu mang mẹ̌kẹ̌kiwal᷊o su ral᷊ung naung,

⁸”Baugu sarang karěngụ e ngae MAWU tawe měnarimạ kụ selain tawe i pakawala tangu?

⁹Apa i Sie seng něngědo kiměndagi kami? Kai seng tawe něnukụ kědonʼE tangu i Sie lai?

¹⁰Seng niwul᷊e Ruata e kuměndagẹ̌ tangu? Limangehẹ̌ tangu i Sie, hakịu seng tawe kuměndagẹ̌ e kapia?”

¹¹Bọu e iạ nẹ̌bera, ”Seng ini e nakatědụ naungku, u Karangetange semben tawe saụ nẹ̌kawasa kapia.”[40]

¹²Iạ e mapulu měnẹ̌naung kal᷊awọu kakanoạʼU MAWU, makạtahěndung karal᷊inaụʼU tempo nạung tamai-tamai.

¹³Iạ e mapulu mẹ̌sipiru kal᷊awọu apang kẹ̌koatengʼU, ringangu mẹ̌tẹ̌tiněnnang manga karạdiahangʼU e mapapia e.

¹⁴O Ruata, kal᷊awọu karạdiahangʼU e susi, i sai ngae kere Ruatang kami e kasěllahe?

¹⁵Seng i Kau e Ruata kụ mẹ̌kẹ̌koạ karal᷊inaụ, kawasa-Nu e seng nilahẹʼU su tal᷊oarang manga wansa.

¹⁶Kahiang katoghasʼU e pinakal᷊iwirʼU e umatʼU, pal᷊ahiten Yakub dẹ̌duang Yusup.

¹⁷Nakasilo si Kau, o Ruata, akẹ e ghimoẹ̌, wal᷊ahuangu laudẹ̌ e mal᷊aing gimanuẹ̌.

¹⁸Binawa e naparasehu tahiti, děllụ e ghụgal᷊ẹ̌gehẹ̌, kilạ e mẹ̌sẹ̌sasahedẹ̌ tamai ramahi.

¹⁹Děllụ e ghụgal᷊ẹ̌gehẹ̌, kilạ e napidarẹ̌, banua e kimiọ dingangu simal᷊ungkende.

²⁰I Kau e rimal᷊eng limiu luạ, liměbạ taghal᷊oang, kaiso ěnnạ u laedʼU e tawe i kasasilo.

²¹Mẹ̌sul᷊ungu lukadẹ̌ e i Kau něngahạ umatʼU, limiun Musa e rẹ̌duang Harun.