Read Sangir MAZMURẸ̌ 78 Bible Online

MAZMURẸ̌ 78 - Sangir bible

MAZMURẸ̌ 78

¹Kakantarị tatěntirong Asaf. Daringihẹ̌ko těntiroku, ei bansaku, naungeko kal᷊awọu waweraku.

² Iạ e mapulu mẹ̌berang sasaili ringangu laumpama, ringangu měnualagu tatinggung u nạung tempo kal᷊imona,

³apạeweng kinaringihi kami e ringangu kinatarimạ, nipẹ̌biong manga i upung i kami.

⁴I kami e mạdiri měnděmasu ene su manga anạ i kami; i kami e mapulu mẹ̌habaru ene su pal᷊ahanạ samuri mạanung kawasang MAWU e ringangu kal᷊awọu munara-Ne ghaghuwạ e, ore lai kal᷊awọu kakanoạʼE makạdal᷊inaụ.

⁵Baugu tau Israel i Sie něngonggọu tita-Ne, ringangu waugu hěnton Yakub e parenta-Ne. I Sie něngoro manga i upung i kitẹ e pěněntiro su manga anạ i sire,

⁶tadeạu pal᷊ahěnto tuhụ e masingkạ i Sie, mase měněpasu ene su manga anạ i sire.

⁷Ual᷊ingu kerene tangú i sire lai sarung mangumbalang pělaharapi sire su Mawu Ruata, ringangu tawe miwul᷊eng kakanoạʼE, kaiso kawe mang matuhụ su tita-Ne,

⁸tadeạu i sire wal᷊inewe kere i upung i sire kụ puluange měnggohaeng dingangu mẹ̌duruhaka; bihingu apang mal᷊ongkọ pangangimange, ringangu tawẹ satiane su Mawu Ruata.

⁹Hěntong Efraim kụ piạ aghide papitị dingangu naěnakeng, timal᷊ang u wadang i sire e su tempong mẹ̌sekẹ.

¹⁰I sire lumampa riandin Duata e si sire, ringangu mạdiri tumuhụ tita-Ne.

¹¹I sire miwul᷊eng kal᷊awọu kakanoạʼE, ringangu kal᷊awọu hal᷊ẹ̌ makạdal᷊inaụ kụ nilahẹ e si sire.

¹² Su těngong manga i upung i sire e, Ruata e mẹ̌kẹ̌koạ karal᷊inaụ su wanuang Misirẹ̌, su Zoan su matenene.

¹³ I Sie naměta laudẹ̌, bọu ene napal᷊iun sire e; akẹ e nipakatei-Ne kere pěnanampungang.

¹⁴ I Sie měngẹ̌ngahạ si sire ringangu winawa su tempong ěllo ringangu tualagu putung su tempong hěbi.

¹⁵ I Sie něměka wul᷊udu watu su wanua l᷊inggi, ringangu napěnginung i sire e pědẹ̌dal᷊embo.

¹⁶Bul᷊udu watu e nịlaoro-Ne apẹ̌něbangu akẹ, bọu e apaelehu akẹ kere sal᷊ụ.

¹⁷Kaiso i sire e měngkate tatapẹ̌ mẹ̌dẹ̌dosa su těngon Duata, su wanua l᷊inggi i sire němpẹ̌pahuwungkadẹ̌ su těngong Karangetange.

¹⁸ I sire mẹ̌tẹ̌tatudẹ měnal᷊ukạ Duata, kụ měnẹ̌nuntụ kaěng i lẹ̌ěnning i sire.

¹⁹I sire rụdokạ Duata kapẹ̌bẹ̌berane, ”Makaumal᷊ẹ̌ bue Ruata e mapakaěng i kitẹ e su wanua l᷊inggi tangu?

²⁰Mamben těngadẹ̌ i Sie němanggo wul᷊udu watu makětị e, hakịu akẹ e nelehě maihạ. Kaiso wotonge lai i Sie makasadia borotẹ̌ dingangu měngonggọu kinạ gěsing binatang su manga umatʼE tangu?”

²¹Nakaringihẹ̌ ene, Duata e limangehẹ̌ kụ napakahumagu putung su manga umatʼE; kụ dal᷊angehʼE si sire e mangkeng kakạhunụ e,

²²watụ u i sire tawe mangimang su Mawu Ruata e, su kawasa-Ne kụ makasal᷊amatẹ̌ si sire e.

²³Maningbe kerene i Sie mẹ̌parenta langị mědeạu měnope manga tukade.

²⁴ I Sie mapạsěbangu gandung bọu sorga, manna[41] waugu kaěng i sire e.

²⁵I Sie mạpakaěng i sire e mědẹ̌dal᷊embo; i sire e kụkaěng borotẹ̌ u malạekatẹ̌.

²⁶I Sie lai mạngoro angingu raki e patiụ; kụ ual᷊ingu kawasa-Ne angingu timuhẹ̌ e tumiụ.

²⁷I Sie mapạsěbangu manga manụ u winalangeng e waugu umatʼE, kal᷊awọ e tangu mẹ̌sul᷊ungu ěnne tawe i karekeng.

²⁸Nipakanawo-Ne manga manụ u winalangeng e su manga tenta mạngělikụ tampạu katatanakeng i sire e.

²⁹Bọu e němpẹ̌kaěngke i sire sarang něngkal᷊aedẹ̌, u Ruata e seng nẹ̌gěllị u apang kụ i lẹ̌ěnning i sire.

³⁰Kaiso abul᷊in sire e bědang lai tawe nạsahe; kụ i sire měngkai wědang mạhungkaěng,

³¹Duata e limangehẹ̌ kụ dimokạ si sire; nipakapate-Ne apan tau Israel mangangudạ e ringangu matatětogẹ̌ e.

³²Maningbe kerene umatʼE měngkai kạtatanạ mẹ̌dẹ̌dosa, karal᷊inaụʼE tawe makakariadin sire mangimang.

³³Tangu Ruata e mạmero e pẹ̌bawiahi sire e kere singongo, kụ kal᷊awọu taung i sire e masuẹ e su ral᷊ungu katatakụ.

³⁴Balạewe Ruata e měmate manga pirang katau su tal᷊oaran sire e, bal᷊ine e tangú mẹ̌sẹ̌sasěsilẹ̌ dingangu mẹ̌sul᷊e kapia si Sie.

³⁵I sire makạtahěndung u Ruata e mạngěllung si sire, dingangu Limembong Kawasa e měnanal᷊amatẹ̌ si sire.

³⁶Kaiso i sire e nẹ̌konti si Sie, kal᷊awọu waweran sire e mang konti samatang.

³⁷ I sire e tawẹ satiane si Sie ringangu tawe mẹ̌tatumpaedẹ̌ su riandi-Ne.

³⁸Kaiso Ruata e kụkěndagẹ̌ dingangu mạngampung umatʼE, ringangu tawe mapakawinasan sire. Masau su sul᷊ene i Sie mẹ̌tẹ̌tingkědang u pědu-Ne, ringangu tawe mẹ̌bawawuntakelu ral᷊angehʼE.

³⁹I Sie nakatahěndung u i sire kětạeng diadikang tawe kakalẹ̌, kere anging kụ sụsahe tawe mẹ̌sasul᷊e.

⁴⁰Tawẹ kakuhạ e i sire mẹ̌pahuwungkadẹ̌ su těngo-Ne, ringangu makạtědụ naungʼE nạung bědang su wanua l᷊inggi e.

⁴¹Masaun sul᷊ẹ e měnẹ̌nal᷊ukạ Duata, mapakạsigěsạ u Masusi, Ruatang Israel.

⁴²I sire tawe mẹ̌tatahěndung u kawasa-Ne, su ěllọeweng i Sie mapakạl᷊iwiri sire e wọu rokạ,

⁴³piạ i Sie e nẹ̌koạ manga karal᷊inaụ su Misirẹ̌ e, ringangu manga tanda makạl᷊aherang su wimbaengu Zoan.

⁴⁴ Kal᷊awọu manga sal᷊ụ i sire e niwal᷊ui-Ne nakoạ daha, hakịu i sire e tawe nakainung akene.

⁴⁵ I Sie nanigěsạ si sire e ringangu lango mal᷊awọ, ringangu napakawalang ěntanan sire e pinakagholọ su tumpepạ.

⁴⁶ I Sie maparěntang ul᷊idẹ̌ dingangu kal᷊imbotong, apěngěnsue pěnsạ u waeli sire e ringangu lěnnạ u rahami e.

⁴⁷ I Sie mapakagholọ u kalung anggori sire e ringangu tahiti kompelẹ̌, dingangu manga kalung aran sire e kahian namuhẹ̌ makětị.

⁴⁸I Sie napakawalan tahiti eisẹ̌ e pinakahumagẹ̌ su binatang i sire, dingangu rěllụ[42] piněnahedẹ̌ manga binatang i sire.

⁴⁹I Sie mapẹ̌buntiagu ral᷊angehʼE kụ dụděllị e, ringangu měndolohu malạekatu papate sěmbuntuang kụ makapěndụ naung i sire.

⁵⁰I Sie tawe měnganguhung libutu-Ne arau tụtal᷊ěntụu pẹ̌bawiahi sire, kaiso mapakawinasan sire ringangu sakị marěkẹ.

⁵¹ I Sie němate manga anạ esẹ kaiakanenge suapam bal᷊en tau Misirẹ̌.

⁵² Bọu e i Sie něngahạ umatʼE kere ghapaěngu domba, ringangu maparal᷊eng i sire e lumiu wanua l᷊inggi.

⁵³ Su ral᷊ungu pěngangahạ e i sire e tawẹ konsange ringangu tawẹ gěnggange, arawe sědụ i sire e nawul᷊usẹ̌ su ral᷊ungu laudẹ̌.

⁵⁴ Bọu e umatʼE niwawa-Ne sol᷊ong ěntananʼE susi e, sol᷊ong bawul᷊urange kụ nihampasʼE hala e.

⁵⁵ Su těngong umatʼE i Sie něnokol᷊ẹ̌ tumanạ e sene bọu e nipẹ̌papahiạʼE wanua ene su patikụ hiten tau Israel umatʼE, hakịu i sire nakakatanạ su manga tentan sekẹ.

⁵⁶ Kaiso i sire e němpẹ̌pahuwungkadẹ̌ dingangu měmpěmẹ̌manikạ Duata Karangetange, manga tita-Ne tawe tatuhukang i sire.

⁵⁷I sire němpẹ̌tul᷊a kere i upung i sire, ringangu tawe kapangimangeng mẹ̌sul᷊ungu naěnakeng kụ bengkọ.

⁵⁸I sire e lụlewang Duata, ringangu tampạu pananěmbaěng mahang duata, kụ nakakasingking si Sie ringangu manga tul᷊adan sire.

⁵⁹Nakasilo ene e Ruata e limangehẹ̌ marasai, kụ něnalaki sire e tawẹ sěnsahabe.

⁶⁰ I Sie něněntangu tenta-Ne su Silo,[43] tampạ katatanakengʼE su tal᷊oaran taumata.

⁶¹ I Sie napakawalam Petim Pẹ̌dariandinʼE nitaweng; tatialang kawawantugʼE, nipul᷊ahon sekẹ.

⁶²I Sie limangehẹ̌ su manga umatʼE, tataghuaneng ore lai pusakạʼE, ringangu napakawalan sire pakapateʼm peda.

⁶³Manga laumbaseng i sire e kanengangu putung, kụ tawe mẹ̌kawingu manga mahualan sire.

⁶⁴Manga imang i sire e pateěng u peda, manga wawine wal᷊un sire e tawe makakasangị.

⁶⁵Tangu MAWU e nẹ̌bangung kere taumata nẹ̌bangung bọu nẹ̌tikị, kere taumata matoghasẹ̌ nasueng inunge anggorẹ̌ e.

⁶⁶I Sie napakasohọ u sědụʼE, ringangu mamatạ si sire waugu sarang marěngụ-děngụ.

⁶⁷Kaiso i Sie měnalaku hěnton Yusup dingangu tawe němile hěntong Efraim.

⁶⁸Nipile-Ne ute kai hěnton Yehuda, ringangu Wongkon Sion kụ nital᷊ěntukangʼE.

⁶⁹I sie němangung Bal᷊enʼE kere katatanakengʼE su sorga, ringangu mẹ̌sul᷊ungu wanua, kụ matoghasẹ̌ sarang marěngụ-děngụ.

⁷⁰ I Sie němile si Daud ěllangʼE, ringangu něngal᷊ạ si sie wọu ghopol᷊angu binatang,

⁷¹bọu tampạ i sie mẹ̌padul᷊i i něngen domba, waugu pěngahạ tau Israel umatʼE.

⁷²I Daud nẹ̌padul᷊i si sire ringangu karal᷊oahu naung, dingangu mạnata si sire, ringangu kapelesa.