Read Sangir MAZMURẸ̌ 80 Bible Online

MAZMURẸ̌ 80 - Sangir bible

MAZMURẸ̌ 80

¹Baugu měngangahạ kantarị. Tumuhụ lagung: Bungangu Ghal᷊oghong. Mazmur sasahiding Asaf.

² O Měndal᷊ukadu Israel, daringihẹ̌ko, i Kau e něngahạ hěnton Yusup kere ghapaěnge. I Kau e kụ seng naintol᷊ang su wowong kerub e,[44] pẹ̌těngkal᷊ahẹko su hiansange,

³su těngong Efraim, i Benyamin dingangu i Manasye. Todẹko kawasa-Nu e si kami, dingangu rěntako pěngambang si kami.

⁴O Mawu Ruata, apakaul᷊eko i kami e; tatinganeko i kami ringangu tatal᷊ěntụ u, tangu i kami e sarung masal᷊amatẹ̌.

⁵O MAWU Ruata Makawasa, sarang kạděngụ e i Kau e lumangehẹ̌, manimbe umatʼU e mẹ̌kal᷊iomaneng?

⁶NighěllirangʼU e i kami sasangị nakoạ kaěng, akẹ u mata e limanabẹ̌ nakoạ inumang.

⁷Niwala-Nu e pinẹ̌sitoring ěntanang kami manga wansa su l᷊ampung, kụ manga rumarokạ i kami e lụl᷊ěgen dal᷊uasẹ̌.

⁸O Ruata Limembong Makawasa e, apakaul᷊eko i kami e; tatinganeko i kami e ringangu naung napenẹ u kakěndagẹ̌, tadeạu i kami e masal᷊amatẹ̌.

⁹UmatʼU e mẹ̌sul᷊ungu kalung anggorẹ̌ kụ nịpapuạ u wọu Misirẹ̌. Manga wansa wal᷊ine e nitokol᷊u, bọu ene nisuangʼU kalu ene su wanuan sire.

¹⁰I Kau e něndiahing ěntana waugʼi sie; tangu i sie něhamụ maral᷊ung-dal᷊ung dingangu nawatedẹ̌ su kasěllahu wanua.

¹¹I sie mạngěllung manga wongkone, ringangu kahiạeweng manga lelange něhěmbung manga kakaluangu arasẹ̌ niupunange.

¹²Manga hakondane timiol᷊ẹ̌ sarang Laudẹ̌ Tal᷊oara, manga sahěnsonge nịdatingu Sal᷊ụ u Efrat.

¹³O Ruata, unụ e nipakahaka-Nu e pagare, hakịu apan taumata kụ sumahe, makapěnipo wuane?

¹⁴Bawing kěhu e makapěmẹ̌muigẹ̌ sarang pakạbungkalang, kụ binatang su wimbaenge e kumakaěnge.

¹⁵O Ruata Limembong Makawasa e, děntako kapia, tatinganeko wọu sorga e ringangu kakěllaiko umatʼU e.

¹⁶Ambangeko umatẹ̌ kụ mẹ̌sul᷊ungu kalung anggorẹ̌ kụ seng nịsasuangʼU hala e, ringangu hětịu anggorẹ̌ kụ seng nipakatoghasʼU.

¹⁷Kahian sědụ e seng nituwang dingangu nitutunge; balạekere i sire pakawinasa kahian dal᷊angehʼU.

¹⁸Ěllungko taumata kụ seng nipile-Nu e, ringangu anạ u taumata kụ seng nipakatoghasʼU waugʼU e.

¹⁹Tangu i kami e sembelain tawe mělenga wọu anu-Nu; lukadeko pẹ̌bawiahi kami, kụ i kami e sarung mẹ̌dalo si Kau.

²⁰O MAWU Limembong Makawasa, apakaul᷊eko i kami, tatinganeko i kami ringangu karal᷊ondon naungʼU, tadeạu i kami e masal᷊amatẹ̌.