Read Sangir MAZMURẸ̌ 81 Bible Online

MAZMURẸ̌ 81 - Sangir bible

MAZMURẸ̌ 81

¹Baugu měngangahạ kantarị. Tumuhụ lagung: Gitit. Bọi Asaf.

²Pẹ̌kantarịkong kakantarị daralo waugu Ruata, katoghasi kitẹ e, pěmpahul᷊uasẹ̌ko ringangu pěmpahul᷊iagẹ̌ baugu Ruatang Yakub.

³Apahěteko arabanạ, pěhengkẹko lagu, pěngutiko nalang kẹ̌kobitang dingangu kěcapi e pakal᷊ěno.

⁴ Pěniụko slompretẹ̌ su ěllong kitẹ mawantugẹ̌ e, su sal᷊iwangu wul᷊ang buhu ringangu wul᷊angu limangu.

⁵U ene kai sěmbaụ tundu su Israel, sěmbaụ parenta wọu Ruatan Yakub.

⁶I Sie mapakạdiading ene e sěmbaụ atorange waugu wansang Israel, su tempong i Sie tamai rumokạ Misirẹ̌ e. Iạ nakaringihẹ̌ bera kụ běgaku e,

⁷”Iạ e seng něhengkẹ bawawaěng bọu pal᷊ukanu, ringangu něměllọu patanga tatingkul᷊uange wọu l᷊imanu.

⁸ Su ral᷊ungu kasasigěsạ, i kamene e kụkakindoạ, kụ Iạ e měngambang si kamene. Takụ simbaheng i kamene e wọu rěllụ tampạ pẹ̌kěmbuniang-Ku, Takụ banikateng i kamene e su simbul᷊u akẹ u Meriba.

⁹Daringihẹ̌ko tatumbal᷊ung-Ku, ei manga umatẹ̌-Ku, Israel kereu i kamene mapulu rumaringihẹ̌ si Siạ!

¹⁰ Kumbahang piạ duata wal᷊ine su tal᷊oarang kamene, kumbahang maněmba ruata raghị.

¹¹Iạ e kai MAWU Ruata-Nu, kụ něngahạ i kamene siměbang bọu Misirẹ̌. Su tempong i kamene nahutung i kamene Takụ nighěllirang u kaěng.

¹²Arawe umatẹ̌-Ku e mạdiri rumaringihẹ̌ si Siạ, Israelẹ̌ e mạdiri tumuhụ si Siạ.

¹³Ual᷊ingu ene Iạ e napakawalan sire e mẹ̌tul᷊i kětị; balạekere i sire tatol᷊ene kapulun sire hala e.

¹⁴Ah, kereu andene umatẹ̌-Ku e mapulu rumaringihẹ̌ si Siạ, kereu i sire mapulu tumuhụ si Siạ,

¹⁵tangu Iạ e lighạ mapasěllungu sědụ i sire, ringangu měmatạ kal᷊awọu rokạ i sire.

¹⁶Taumata apang mạběnsingu Iạ e sarung Takụ i pẹ̌samal᷊ẹ, i sire sarung i hukung sarang marěngụ-děngụ.

¹⁷Arawe umatẹ̌-Ku e sarung Takụ gellirang u gandung pile, dingangu Takụ i pakal᷊aedu madung kěhu.”