Read Sangir MAZMURẸ̌ 83 Bible Online

MAZMURẸ̌ 83 - Sangir bible

MAZMURẸ̌ 83

¹Mazmuri Asaf: kakantarị sěmbua.

²O Ruata abe pěmou, abe pẹ̌kokọ awạ dingangu kạtatanạ marěmasẹ̌.

³Kakěllako sědụʼU e nẹ̌ganohạ, kal᷊awọu taumata apang mẹ̌bẹ̌binsị i Kau e němpẹ̌buntirisang.

⁴I sire nẹ̌koạ karaki mal᷊ěnibẹ̌, dumokạ manga umatʼU; dingangu mẹ̌dal᷊ahintau rumokạ kal᷊awọu taumata apang lẹ̌ěllungangʼU.

⁵Angkuěng i sire, ”Mahịe pakailang i kitẹ tau Israelẹ̌ e, tadeạu areng i sire e semben tawe tahěndungang.”

⁶Manga wansa e seng němpẹ̌těngkasěmbaụ dingangu němpẹ̌dal᷊ahintau rumokạ si Kau:

⁷tau Edom dingangu tau Ismael, ghal᷊ipohon tau Moab dingangu ghal᷊ipohong Hagar,

⁸tau Gebal, Amon dingangu Amalek, tau Filistea ore lai tumanạu Tirus.

⁹Kerene lai Asyur seng nẹ̌dal᷊aụ dingang i sire, nakoạ tumanggihu pal᷊ahiten Lot.

¹⁰ Pẹ̌koạ e si sire kere su tau Midian, kere si Sisera, ringangu si Yabin, su Sal᷊ụ u Kison,

¹¹kụ seng nipakawinasa su Endor, dingangu nakoạ tatawa ěntana.

¹² Pẹ̌koạ e su manga těmbonang i sire kere si Oreb, dingangu si Zeeb, apẹ̌samal᷊ẹko mangangawasa si sire kere si Zebah ringangu si Salmuna,

¹³ual᷊ingu i sire e seng nẹ̌bera, ”Mahịe kaianeng i kitẹ e ěntana katatanakengu Ruata.”

¹⁴O Ruata kal᷊iaesẹ̌ko i sire kere awul᷊ẹ̌, mẹ̌sul᷊ungu rěmpugẹ̌ mahěgu nitěllạu anging.

¹⁵Kere putung makatutung dal᷊one, dingangu rěllị u putung makahěngisẹ̌ manga wul᷊ude.

¹⁶Sahusueko i sire ringangu suwu-suwu-Nu hěkoseko i sire ringangu kal᷊isusu-Nu.

¹⁷O MAWU, walạete i sire pakitelore, tadeạu i sire měngaku wue kawasa-Nu.

¹⁸Walạete i sire sarang marěngụ-děngụ i pakamea ringangu su katatakutang, kụ i sire mate su ral᷊ungu sasamedẹ̌.

¹⁹Mal᷊owọko i sire masingkạu kětạeng i Kau e Limembong Karangetange, MAWU, kụ něngawasa kasěllahu dunia.