Read Sangir MAZMURẸ̌ 85 Bible Online

MAZMURẸ̌ 85 - Sangir bible

MAZMURẸ̌ 85

¹Baugu měngangahạ kantarị. Mazmuru ghal᷊ipohong Korah.

²I Kau e seng limuasu wanua-Nu e MAWU! Kakakoạu Israel seng nipakaul᷊ịu kapia.

³I Kau e seng nangampung kal᷊awọu rosang manga umatʼU; niampungangʼU kal᷊awọu pẹ̌sasal᷊ane.

⁴I sire e semben tawe lai pẹ̌bawal᷊uangengʼU; ral᷊angehʼU marasai e seng saụ lẹ̌ul᷊enangʼU kapia.

⁵Apakaul᷊eko kapia i kami Mawu měnanal᷊amatẹ̌ si kami, kumbahang delaing lumangehẹ̌ si kami e.

⁶Kai sarang kạděngụ e tangú i Kau e lumangehẹ̌ si kami, dingangu tatapẹ̌ lụlibutu wọu hěnto sarang hěnto?

⁷Toghaseko i kami e kạpia tadeạu i kami umatʼU e mạhul᷊uasẹ̌ ual᷊ingu tul᷊umangʼU e.

⁸Todẹko u i Kau e měngkai sěntiniạ kụkěndagẹ̌ MAWU! onggotengkong kasasal᷊amatẹ̌ e wọu anu-Nu.

⁹Iạ e mapulu rumaringihẹ̌ hengetangu MAWU Ruata; i Sie nẹ̌dianding katataghupia si kitẹ, umatʼE, asal᷊u i kitẹ e tawe saụ mẹ̌koạ pẹ̌sasal᷊agẹ̌.

¹⁰Mamben těngadẹ̌, i Sie sadia mapakasal᷊amatu taumata mal᷊aagama, Duata kụ mawantugẹ̌ e sarung mẹ̌tumanạ su wanuang kitẹ e.

¹¹Kakěndagẹ̌ dingangu kasasatia e sarung mẹ̌sombang, kạadilẹ̌ e ringangu pẹ̌darame sarung měmpẹ̌dal᷊ahěkụ.

¹²Kasasatian taumata e sarung sumombọ bọu wanua, ringangu kạadilu Ruata e rụdal᷊inge wọu langị.

¹³MAWU e měngonggọu apang mapia e, tangu ěntanang kitẹ e sarung mẹ̌ngonggọu hasile.

¹⁴Kạadilẹ̌ e sarung měngal᷊imona MAWU, ringangu měndiahin dal᷊eng baugʼi Sie.