Read Sangir MAZMURẸ̌ 86 Bible Online

MAZMURẸ̌ 86 - Sangir bible

MAZMURẸ̌ 86

¹Kakal᷊iomaneng i Daud. Daringihẹ̌ko kakal᷊iomanengku e MAWU, ringangu simbaheko iạ e, u iạ kai kasiang dingangu lome.

²Diagateko pẹ̌bawiahẹ̌ku, u i Kau e kụkěndagu iạ, apakasal᷊amatẹ̌ko ěllangʼU e kụ mạngimang si Kau.

³Seng i Kau e Ruataku, tal᷊ěntụkon iạ e MAWU, u kanandung ěllo e iạ mẹ̌kẹ̌kal᷊iomaneng si Kau.

⁴MAWU, apakal᷊uasẹ̌ko naungu ěllangʼU e, u kai si Kau e iạ mělẹ̌hengkẹ u naungku.

⁵I Kau e mapia, MAWU, ringangu makěhagẹ̌ měngonggọu ampung, taumata apang mẹ̌kẹ̌kal᷊iomaneng si Kau e měngkai tatapẹ̌ ikẹ̌kaonggọu kakěndagʼU mẹ̌dẹ̌dal᷊embo.

⁶O MAWU kasěllahenge, sěmpikeko kakal᷊iomanengku, daringiheko kakindoạku makịtul᷊ung.

⁷Su tempong kasasěsẹ iạ mẹ̌kẹ̌kal᷊iomaneng si Kau, u i Kau e simimbang si siạ.

⁸O MAWU, tawẹ apa ruata kere i Kau, tawẹu nẹ̌koạ apang nịkakoạʼU.

⁹ Patikụ bansa kụ niriadi-Nu e sarung duměnta MAWU, baugu měněmba si Kau ringangu mẹ̌pudi kawawantugʼU e.

¹⁰U i Kau e makawasa, ringangu mẹ̌kẹ̌koạ hal᷊ẹ̌ makạdal᷊inaụ, kụ samatang i Kau e Ruata.

¹¹Těntiroko kapulunʼU e si siạ MAWU, tadeạu iạ e tumol᷊ewe ringangu satia; kụ apakakoạko iạ e matuhụ dingangu kạguwạu naung.

¹²Iạ e makitarimakasẹ si Kau ringangu kạguwạu naungku e, o MAWU Ruataku; iạ e mapulu mẹ̌pudi kasěllahʼU e sarang marěngụ-děngụ.

¹³U i Kau e tatapẹ̌be kụkěndagu iạ dingangu kakěndagu e masaria; i Kau e seng něngambang niawaku e wọu ral᷊ungu lẹ̌bing.

¹⁴Mawu Ruata, taumata mal᷊aondohị damahi rumokạ si siạ, tahapate sěnggapaeng e ramahi měmate si siạ; i sire tawe mẹ̌diaʼm piạ i Kau e.

¹⁵Kaiso i Kau, MAWU Ruata makěndagẹ̌ dingangu matal᷊ěntụ, masabarẹ̌, napenẹu kakěndagẹ̌ dingangu kasasatia.

¹⁶Tatinganeko ringangu kěndagẹ̌kon iạ e, toghaseko ringangu ambangeko iạ, u mẹ̌sul᷊ung i ninangku e, iạ e mal᷊aing mẹ̌kẹ̌kal᷊iomaneng si Kau e MAWU.

¹⁷Gělirengkon tatialang kapia-Nu, e MAWU, tadeạu taumata apang měmpẹ̌binsị u iạ e měngkamea, kereu i sire makasilo si Kau mẹ̌tul᷊ung dingangu měhiborẹ̌ si siạ e.