Read Sangir MAZMURẸ̌ 88 Bible Online

MAZMURẸ̌ 88 - Sangir bible

MAZMURẸ̌ 88

¹Kakantarị. Mazmuru ghal᷊ipohong Korah. Baugu měngangahạ kantarị. Tumuhụ lagung: Mahalat Leanot. Kakantarị těntirong Heman, tau Ezrahi.

²O MAWU, Ruata kụ něngambang si siạ, su tempong ělloe iạ mẹ̌kẹ̌kui si Kau, su tempong hěbi e iạ mẹ̌tẹ̌těngong Kau.

³Mal᷊owọko kakal᷊iomanengku e mahumpạ su anu-Nu, kụ daringiheko kakindoạku.

⁴Iạ e nihombangengu haghin sigẹ̌sạ; papate e seng su těngon tukadẹ̌.

⁵Iạ e kere taumata kụ sarung lumintụ sarang lohangu lěbingu taumata kụ kinasueěngu toghasẹ̌.[46]

⁶Iạ e nitěntang su tal᷊oaran taumata nate, mẹ̌sul᷊ungu taumata kinapate, rụdal᷊oka su ral᷊ungu lěbing, mẹ̌sul᷊ungu taumata kụ nikawul᷊enangʼU marihutu, taumata e kụ seng tawe lai nitul᷊ungʼU.

⁷I Kau e něnděmmẹ u iạ e su lohange maral᷊ung, sarang liangu kubul᷊ẹ̌ maral᷊ung kutẹu lai marěndung.

⁸Dal᷊angehʼU e mạnědạ si siạ e mawěhạ, kụ iạ e napěsụ pinangěnsakengu ral᷊angehʼU e.

⁹Takụ i pakarau manga hapịku e wọu anuku, dingangu kinoạʼU iạ nakasahe si sire. Iạ e nal᷊ingkubẹ̌ kụ tawe makakasěbang,

¹⁰mataku e nawolọ kahian sunsara. Apang kal᷊aěllo e iạ e kụkahiorọ si Kau MAWU, ringangu mẹ̌kal᷊iomaneng kụ lima e kạl᷊aul᷊uhẹ̌.

¹¹I Kau e nẹ̌koạ bue karal᷊inaụ baugu taumata nate? I sire e sadia wue měmpẹ̌pětị, kụ mase mẹ̌sul᷊e mẹ̌dalo si Kau?

¹²Unụe kakěndagʼU e kai ilẹ̌ul᷊ị su ral᷊ungu kubul᷊ẹ̌, dingangu satianʼU e su tampạu kawawinasa?

¹³Piạbe masingkạu karal᷊inaụʼU e su ral᷊ungu kararěndung, arau kapia-Nu e su wanua tampạu taumata kụ nikawul᷊enang?

¹⁴Kaiso iạ e mẹ̌dorong tul᷊umangu e MAWU, apang kamal᷊ukadẹ̌ e mělẹ̌hengkẹu kakal᷊iomanengku e si Kau.

¹⁵O MAWU, i Kau e měnděmmẹu iạ? Unụ e i Kau e měmuning gatinʼU e si siạ?

¹⁶Dongkeng kadodọ iạ e masunsara ringangu lẹ̌likatengu papate, iạ e nawaụ[47] u pěnanal᷊udẹ̌ hukumangʼU.

¹⁷Dal᷊angehʼU e enẹ e mạhěmpal᷊iu mapakagholọu iạ; pěndarokạʼU e si siạ apạe mahuagatẹ̌ mapakawinasang iạ.

¹⁸Kanandung ěllo e ral᷊angehʼU e mẹ̌sul᷊ungu lěba mạngělikụ si siạ, mělẹ̌liwung si siạ bọu kěbị tampạ.

¹⁹Apang hapịku kantalẹ̌ e nipakaraunʼU wọu anuku e, kụ nal᷊ěmbe kate kararěndung dimingang si siạ.