Read Sangir MAZMURẸ̌ 89 Bible Online

MAZMURẸ̌ 89 - Sangir bible

MAZMURẸ̌ 89

²KakakěndagʼU e MAWU, takụ kantarikang sarang marengụ-děngụ, satianʼU e sarung takụ i pakasingkạ bọu hěnto sarang hěnto.

³Batụu iạ e masingkạu kakěndagʼU e kakalẹ̌ tạ kahěpusange, satianʼU e mauwuhẹ̌ kere langị.

⁴I Kau e něhengetang, ”Iạ e seng mẹ̌taingu pẹ̌kakakědo sěmbaụ dingangu taumata pinile-Ku e; Iạ e seng mẹ̌salu si Daud, ěllang-Ku e:

⁵ ’Kal᷊aianengu Takụ tahutěndakeng sarung marěngụ-děngụ, hěnto mẹ̌bẹ̌bawěllasẹ̌ e, anạ pulungu e sarung makakaiang.’ ”

⁶Komol᷊angu masorga e mẹ̌dẹ̌dalo kal᷊awọu kakanoạʼU makạdal᷊inaụ e, ringangu mẹ̌kantarịu satianʼU e, MAWU.

⁷Su langị e tawẹ apa kere i Kau e MAWU, tawẹ diadikang masorga e kụ mẹ̌sul᷊ung i Kau.

⁸I Kau e lẹ̌adateng su ghal᷊ipohong masasusi e, i kẹ̌katakụu něngalembo wọu kěbị mạngělikụ si Kau.

⁹MAWU, Ruata Limembong Kawasa, i sai wue mẹ̌sul᷊ung i Kau e katoghase? I Kau e satia su ral᷊ungu patikụ e MAWU.

¹⁰I Kau e kawasa su l᷊audẹ̌ piạ mělisange, ringangu makạl᷊ěda luạ gaghaghuwạ e.

¹¹I Rahab[48] nagạu l᷊audẹ̌ e, pinakarul᷊ẹʼU ringangu nipate-Nu, kahiang limanʼU matoghasẹ̌ e niwatạʼU manga sědụʼU.

¹²Langị dingangu dunia e kai tataghuanengʼU, dunia ringangu kal᷊awọu manga ral᷊ohone e kinoạʼU.

¹³Seng i Kau e něndiadi sawěnahẹ̌ dingangu timuhẹ̌, Bul᷊udu Tabor dingangu Hermon mẹ̌gẹ̌gio waugʼi Kau.

¹⁴Apạ e kasěllahe kawasanʼU e, ringangu kai apạ e kaněnggạ katoghasʼU e!

¹⁵Kạadilẹ̌ dingangu toratẹ̌ e kai wawěntang kararatuangʼU, kakěndagẹ̌ dingangu satia e mal᷊ahẹ su ral᷊ungu kal᷊awọu tindakangʼU.

¹⁶Kariangkamang bansa kụ mẹ̌kẹ̌kal᷊iomaneng dingangu ral᷊uasẹ̌, kụ mẹ̌bẹ̌biahẹ̌ su ral᷊ungu tualagu rarěntanʼU e MAWU.

¹⁷Kanandung ěllo e i sire lụluasẹ̌ dingangu kạtatanạ matoghasẹ̌, ual᷊ingu kapianʼU e.

¹⁸I Kau e nẹ̌gěllịu kal᷊auntu mal᷊ahẹ-lahẹ si kami, kụ ual᷊ingu kapia-Nu e i kami nakawatạ.

¹⁹U měnanirung si kami e ute kai taumata pinile-Nu e MAWU; datung kami ute kai tataghuanengu Ruatang Israel kụ Susi e.

²⁰Nạung kal᷊imona-mona su ral᷊ungu sěmbaụ papasilo, i Kau e něhengetang su manga ělangʼU e satia, ”Iạ e seng nẹ̌tul᷊ung u sěngkatau mẹ̌sasekẹ, sěngkataụ e Takụ nipile wọu kawanua nạung seng Takụ pinakarangẹ.

²¹ Iạ seng nẹ̌sombang i Daud, ěllang-Ku e, ringangu Takụ nilanisẹ̌ i sie ringangu lanang pěndal᷊anisẹ̌.

²²Katoghasẹ̌-Ku e sarung hanesẹ̌ mangěllung si sie, kawasa-Ku e sarung makatoghasẹ̌ si sie.

²³I Sie sarung tawe i kawatụ u sekẹ, dingangu sarung tawe i katěllidu taumata ralakisẹ̌.

²⁴Kal᷊awọu sekẹ e sarung Takụ pakawinasa, Takụ pateěng i sai-saing měbinsị i sie.

²⁵Iạ e sarung sěntiniạ kuměndagi sie ringangu satia si sie, ringangu mapakariadin sie mangkeng piạ kawasane.

²⁶Kararatuange sarung Takụ i pakawenahẹ̌, bọu Laudẹ̌ Tal᷊oara sarang Sal᷊ụ u Efrat.

²⁷I sie sarung mẹ̌bera si Siạ, ’I kau e i Amangku, Ruataku, měnanirung dingangu měnanal᷊amatẹ̌ku.’

²⁸ Iạ e sarung mapakariadin sie ahusẹ̌-Ku kaiakanenge, ringangu kawantugange su tal᷊oarang kěbị datu.

²⁹I sie sarung Takụ i kẹ̌kěndagẹ̌ sarang kakalẹ̌, pẹ̌dariandi-Ku e ringange těbewe matoghasẹ̌.

³⁰Kal᷊aianenge Takụ tahutěndakeng karěngụu langị ene su wowon dunia e, hěnto sarang hěnto, anạ pulunge sarung mal᷊aiange.

³¹Arawe kamagengu manga hitene lumampa tita-Ku, dingangu mẹ̌biahẹ̌ tawe tumatuhụ hengetang-Ku,

³²kereu i sire tawe měngindakangu atorang-Ku ringangu mẹ̌sasěmpị tita-Ku,

³³i sire Takụ i hukungu ghagheserẹ̌ ual᷊ingu pěndal᷊ampane, dingangu Takụ ěnsakengu papahang ual᷊ingu rosane.

³⁴Kaiso Iạ e sarung těbe kụkěndagi Daud, dingangu sarung tawe mẹ̌sunial᷊u kasatia-Ku.

³⁵Pẹ̌dariandi-Ku ringange tawe Takụ i kawatal᷊ẹ̌, dingangu riandi-Ku e tawẹu sěmbaụ Takụ i sul᷊e kạpia.

³⁶Sěnsul᷊e waugu sarang karěngụ e Iạ e mẹ̌salu su areng-Ku susi e; Iạ e tawe sarung mẹ̌konti si Daud.

³⁷Kal᷊aianenge sarung mẹ̌daragẹ̌ karěngụeweng matangěllo e ene, kụ anạ pulunge mẹ̌dẹ̌dal᷊ahěnto e sarung makakaiang.

³⁸Kararatuange těbewe ene kere wul᷊ang, sahidi satia su ral᷊ungu winawa.”

³⁹Kaiso orasẹ̌ ini i Kau e limangehẹ̌ su ratu, i Kau e něnděmmẹ dingangu nanolaku taumata pinile-Nu e.

⁴⁰I Kau e seng němatal᷊u pẹ̌dariandi-Nu ringangu ěllangʼU, makotane nirěmmẹʼU su ral᷊ungu lěbo.

⁴¹NipakaopehʼU e manga meselu soane, manga těndạ e seng nipakal᷊ěmbe ěnnạe karạʼU.

⁴²Patikụ taumata kụ sumahe měmpěhampasẹ̌ darotonge, i sie nakoạ su wuang mohongu pělaheghesẹ̌ baugu patikụ l᷊ampung.

⁴³I Kau e nangonggọu kal᷊auntu su manga sekẹ e, ringangu napakariading kal᷊awọu sědụ e měmpạhul᷊uasẹ̌.

⁴⁴Pundangu manga aghide kinoạʼU e tawẹ kěhase, i Kau e tawe nẹ̌tul᷊ung i sie su ral᷊ungu pẹ̌seketang.

⁴⁵Nipakapal᷊usu kawasane mahamagẹ̌ e, kal᷊aianenge nilahipe-Nu su ěntana.

⁴⁶I Kau měnẹ̌nimbụ tempong kangangudạ e, dingangu mělẹ̌hěmbung si sie ringangu kasasamedẹ̌.

⁴⁷Sarang kạděngụ e i Kau e mẹ̌kěmbuni MAWU? Sarang kạděngụ e ral᷊angehʼU e ghụgaheghe kere putung?

⁴⁸Pẹ̌tahěndungko si siạ u kai kanimbụ e pẹ̌bawiahẹ̌ku ini, taumata kinoạʼU e kai kere riadikang tawe kakalẹ̌.

⁴⁹Kai i sai wotonge mẹ̌biahẹ̌ turusẹ̌ kụ tawe mate? I sai wue makatal᷊ang bọu papate?

⁵⁰O MAWU, kai suapa tatialang kakěndagʼU nạung kal᷊imona e, kụ nikědonʼU si Daud ual᷊ingu satianʼU?

⁵¹Pẹ̌tahěndungko MAWU, kereapa ěllangʼU ini e nisamedang, iạ e něnanggung kasasamedu umatẹ̌ lawọ e.

⁵²Kal᷊awọu sědụʼU e měnamedẹ̌ datu pinile-Nu e MAWU, mẹ̌baheaun sie kụ sol᷊ong apa i sie.

⁵³Pẹ̌daloko MAWU sarang marěngụ-děngụ. Koạko kerene! Aming!