Read Sangir MAZMURẸ̌ 9 Bible Online

MAZMURẸ̌ 9 - Sangir bible

MAZMURẸ̌ 9

¹Baugu měngangahạ kantarị. Tumuhụ lagung Mut-Laben. Mazmuri Daud.

²Dingangu kasěllahu ral᷊ungu naung, iạ mapulu makitarimakasẹ̌ si Kau, MAWU, kụ měhabaru karạdiahangʼU makạdal᷊inaụ.

³Iạ e mapulu lumuasẹ̌ dingangu lumiagẹ̌ ual᷊ingu Mawu ringangu mẹ̌dalo arengʼU, MAWU Karangetange.

⁴Su těngonʼU e sědụku mẹ̌bal᷊ị kụ tumal᷊ang; i sire manawo, kụ masangkong bọu ene mate.

⁵U i Kau e nẹ̌parenta kere mělahukung kụ adilẹ̌; i Kau e seng nẹ̌sahiding pěrkaraku.

⁶I Kau e seng něhukung manga wansa dingangu napakawinasang kal᷊awọu taumata ral᷊akisẹ̌; i sire pinakawul᷊e sarang karěngụ e.

⁷Dokạ i kami e seng pinakasue, kal᷊awọu soan sire seng pinakagholangʼU; seng tawẹu lai mẹ̌tahěndung.

⁸MAWU e mẹ̌parenta waugu sarang karěngụ e; i Sie měmětịu kal᷊aianengʼE waugu měhukung dunia.

⁹I Sie mẹ̌parenta kal᷊awọu wansa e su kạadile ringangu měhukung i sire su katul᷊ide.

¹⁰MAWU e kai pẹ̌sasirungangu taumata i pẹ̌tẹ̌tahuěllang, tampạ pẹ̌kakěllungang su tempong kasasěsẹ.

¹¹Taumata kụ masingkạ i Kau e mělẹ̌harapẹ̌ si Kau e MAWU, arawe taumata kụ mạněmba si Kau e tawe nitěntangʼU.

¹²Pẹ̌daloko MAWU kụ mẹ̌pẹ̌parenta su Sion! Pẹ̌běkengkong kal᷊awọu kakanoạʼE su patikụ bansa!

¹³U i Sie matahěndung su taumata apang masunsara ringangu tawe miwawul᷊eng sasikin sire; taumata kụ matatingkaị e i hukungʼE.

¹⁴Kakěllạ e sědụ kụ mapakasunsarang iạ e; tal᷊entụbeng iạ e MAWU, liwirẹ̌ko iạ e wọu papate,

¹⁵tadeạu iạ e mẹ̌dalo si Kau su těngon tumanạu Yerusalem. Iạ e sarung mẹ̌gion dal᷊uasẹ̌ ual᷊ingu i Kau e něngambang si siạ.

¹⁶Kal᷊awọu wansa kụ běgang Kau e mawunsal᷊ẹ̌ su lohange kụ niwangkan sire hala e; i sire sarung maehọ su ral᷊ungu somạ i sire hala e.

¹⁷MAWU seng nělahẹu watangengʼE ual᷊ingu putusangʼE kụ adilẹ̌ e. Taumata ral᷊akisẹ̌ e mawunsal᷊ẹ̌ ual᷊ingu kakanoạ i sire hala.

¹⁸Papate ute kai pěngěnsueěngu patikụ taumata ral᷊akisẹ̌ e, kal᷊awọewem bansa kụ tawe měngangarěgam Mawu Ruata.

¹⁹Bal᷊inewe waugu sarang karẹ̌ngụ e taumata kasiang e i pakawul᷊e; tawe sarang karěngụ e taumata sunsara e tawẹ pělaharape.

²⁰Pẹ̌bangungke MAWU, hukungke kal᷊awọu manga wansa e, abe pakawala taumata e mangobotu watangenge.

²¹Balạekere i sire apakatakụ o MAWU kụ makahěngang u i sire kawe kětạeng taumata.