Read Sangir MAZMURẸ̌ 90 Bible Online

MAZMURẸ̌ 90 - Sangir bible

MAZMURẸ̌ 90

¹Kakal᷊iomaneng i Musa, ěllangu Ruata. O MAWU, seng i Kau e tampạ u pẹ̌kakěllungang i kami e hěnto mẹ̌bẹ̌bawěllasẹ̌.

²Kal᷊amonang manga wul᷊ude kinoạ, kal᷊amonang banua ringangu dunia e niluhudʼU, Mang i Kau e Ruata kụ kakalẹ̌, tawẹ panẹ̌takenge ringangu tawẹ pangěnsueěnge.

³I Kau něngoro taumata e nipẹ̌sul᷊e kapia, nakoạ awul᷊ẹ̌ kere nạung kal᷊imona.

⁴ Si Kau e sěhiwu su taunge kere sěhěllo, ěllo kahěbi e seng napaghohẹ̌; mẹ̌sul᷊ungu sěmbaụ bihingu lukadẹ̌ su tempong hěbi.

⁵I Kau e napakaonodʼi kami; kụ i kami e mẹ̌sul᷊ungu ipi, kere rěmpugẹ̌ kụ piạ tumbal᷊e;

⁶su tempong mal᷊ukadẹ̌ i sie tumuwo ringangu mẹ̌burạ, arawe wawěllo e malolang.

⁷I kami e himěkosẹ̌ kahiang dal᷊angehʼU, ringangu nasue nawinasa ual᷊ingu libutunʼU.

⁸I Kau e něměllọu pẹ̌sasal᷊ang kami e su těngonʼU, rosang kami kạbawuni e nikasilonʼU.

⁹Pẹ̌bawiahi kami e manimbụ ual᷊ingu ral᷊angehʼU, kal᷊awọu taung i kami e mạpaghohẹ̌ kere pělahinggụ u singongo e sěngkasindạ.

¹⁰Ukurʼi kami e kětạeng pitum pul᷊o su taunge, kereu i kami e matoghasẹ̌, ual᷊um pul᷊o su taunge. Kaiso kětạeng kasasěsẹ dingangu sigěsạ kaěbakeng i kami e; mal᷊iung pẹ̌bawiahẹ̌, tạ kararěngụ e, i kami e mal᷊aing maparung.

¹¹I saị e makakiral᷊a kal᷊ahěngị u ral᷊angehʼU, arau makahěngang mapia su aị u ral᷊angehʼU e?

¹²Pakatahuěnnako u kai kanimbụe pẹ̌bawiahẹ̌ ini, tadeạu i kami e makoạ be taumata pelẹesa.

¹³O MAWU, sarang kạděngụ e i Kau e limangehẹ̌? Pẹ̌sul᷊ẹ e ringangu tal᷊ěntụbeng manga ěllangʼU e.

¹⁴Apẹ̌dal᷊emboko kakěndagʼU e si kami, apang kamal᷊ukadẹ̌ e, tadeạu i kami e mal᷊uasẹ̌ dingangu mẹ̌kantarị kanandung pẹ̌bawiahi kami e.

¹⁵Gělirengkon dal᷊uasẹ̌ i kami e pẹ̌timbangkewen sigěsạ tẹ̌tal᷊udang, i kami su ral᷊ungu patikụ taungu sigěsạ.

¹⁶Apasiloko munara-Nu e si kami manga ěllangʼU, ringangu kawasa-Nu e mahamagẹ̌ baugu hiteng kami.

¹⁷O MAWU Ruatang kami, al᷊amateko i kami, tadeạu kal᷊awọu munarang kami e mambeng piạ ual᷊ine.