Read Sangir MAZMURẸ̌ 91 Bible Online

MAZMURẸ̌ 91 - Sangir bible

MAZMURẸ̌ 91

¹Taumata kụ mẹ̌tẹ̌těngkal᷊indung su Karangetange, ringangu mạtanạ su ral᷊ungu naụ u Kasěllahenge,

²wotonge mẹ̌bera su MAWU, ”Seng i Kau e tumatatawang dingangu pẹ̌kakěllungangku, Duataku, seng si Kau e iạ mangimang.”

³I Sie sarung měngambang si kau wọu silakạ mạbawuni, dingangu wọu sakị makạbawa papate.

⁴I Sie sarung měnirung i kau ringangu papanidʼE, hakịu i kau e tawe mẹ̌kapura su ral᷊ungu pananirungʼE; satia-Ne mẹ̌sul᷊ungu kěllung kụ mělẹ̌lindung si kau.

⁵I kau e tawahal᷊uasu matakụ u hombang su tempong hěbi, arau pěngangalo sěngkělěndị e su tempong ěllo;

⁶arau silakạ humombang su tempong kararěndung, arau sawěda mihombang suěllo rangẹ.

⁷Maning sěhiwu su kataune mawatang su sěndihangu, ringangu mapul᷊o hiwu su sěmběkanu koaneng, kaiso i kau sẹ̌sanu e tawe mal᷊esẹ.

⁸Kereu i kau e měmanda pakal᷊ikụ, i kau e makasilo taumata ral᷊akisẹ̌ e kinahinoěngu wawal᷊ise.

⁹U i kau e napakariadin MAWU e tumatatawangu, Karangetange kinoạu pẹ̌sasirungangu.

¹⁰Tangú i kau e tawe kinahinoěngu hombang, bal᷊enu e tawe kinahinoěngu kawawinasa.

¹¹ Duata e něndolohu malạekatʼE pẹ̌děndiagạ si kau, mẹ̌deạu paněntanudẹ̌ si kau waẹbe sol᷊ong apa.

¹² I sire sarung měmpěnal᷊endeng i kau e su pal᷊edu l᷊iman sire e, tadeạu laedu e tawe masangkong su watu.

¹³ I kau e sarung lumempang těmpu e ringangu singa, tumahida singa kawuhuang dingangu saelẹ̌.

¹⁴Angkuěngu MAWU, ”Taumata kụ kuměndagu Iạ e sarung Takụ i pakasal᷊amatẹ̌, kụ něngakung Iạ e sarung Takụ těntanurang.

¹⁵Kereu i sie ghumahiorọ si Siạ, Iạ e sarung sumimbahẹ̌. Su tempong kasasěsẹ, Iạ sarung mẹ̌tul᷊ung i sie; i sie sarung Takụ i pakal᷊iu ringangu Takụ i pakawantugẹ̌.

¹⁶I sie sarung Takụ i pakauwuhu umburẹ̌ manandụ, dingangu Takụ i pakasal᷊amatẹ̌.”