Read Sangir BAWERAN SALOMO 1 Bible Online

BAWERAN SALOMO 1 - Sangir bible

BAWERAN SALOMO 1

¹ Sen tamai ini e sasasa wọi Salomo ahusi Daud, datung Israel.

²Timonane ute kai mẹ̌tul᷊ungu taumata mẹ̌deạ u makakasingkạ u kai kereapa makoạ pelesa, ringangu masingkạ u gampam pẹ̌bawiahẹ̌ dingangu makahěngang kal᷊awọu wawera piạ mangal᷊ene mararal᷊ung.

³Sasasa tamai ini e mạněntiro kereapa taumata wotonge makapẹ̌biahẹ̌ pelesa, matul᷊idẹ̌, adilẹ̌, dingangu matěngadẹ̌.

⁴Taumata kụ tawẹ ěbạ e tẹ̌těntiroẹ̌nge sarang piạ tiněnnane mahoro, ringangu mangangudạ e tẹ̌těntiroěngu makoạ taumata pande ringangu makatiněnna mauwuhẹ̌.

⁵Ual᷊ingu kal᷊awọu sasasa tamai inie taumata pelesa e mal᷊ain sarung mahuntinambang kasingkạ e, dingangu taumata sem piạ sikol᷊ane e sarung makahombang tatane.

⁶Ual᷊ingu ene tangu i sire wotonge makasẹ̌sui mangal᷊ene kạbawuni su ral᷊ungu sasasa ringangu makahěngang kal᷊awọu waweran tau pelesa ringangu kal᷊awọu kul᷊ịdal᷊ange i lẹ̌ukahi sire.

⁷ Mẹ̌deạ u makahombang kasingkạ tutune, humotong-motong taumata e harusẹ̌ piạ pěndangu měngadatẹ̌ dingangu mạtakụ u MAWU. Taumata longong e tawe měngangarěgang kapelesa e ringangu mạdiri těntiroěng.

⁸Tatingangke apan niwerang inang i amang si kau e anạku,

⁹u apan nitěntiron sire e mạnamba kapianu e mẹ̌sul᷊ungu ral᷊ẹ̌gahẹ̌ su těmbọ dingangu kalong makạl᷊ěnggihẹ̌ gahịu.

¹⁰Kereu taumata waradosa e měngologẹ̌ si kau anạku, abe pandunge laologi sire e.

¹¹Manga andene i sire e mẹ̌bera, ”Hotede, mahịe i kitẹ mẹ̌deạ taumata kụ pẹ̌tatibulu si sie. Koạ e tal᷊ewa kụ mahịe i kitẹ měngalo taumata tạ sal᷊ane.

¹²Orasẹ̌ ini i sire e mẹ̌bẹ̌biahẹ̌ masukụ dingangu mahuweka, kaiso hědowe sarung i sire makoạ kere taumata maloarang mate.

¹³I kitẹ měngal᷊ạ apal᷊iwụ i sire mal᷊aarěga e, tadeạu wal᷊eng kitẹ e mapenẹ u apal᷊iwụ pul᷊aho.

¹⁴Mahi e tol᷊e! Apang kụ kinatako e hědọem pẹ̌papahiạ i kitẹ mẹ̌sul᷊ung!”

¹⁵Anạku! Abe tol᷊e ringangu taumata kerene, pẹ̌těngkarau wue wọi sire.

¹⁶I sire tawe makakoạ matanạ marěmasẹ̌ kereu tawe nẹ̌kẹ̌koạ dal᷊akisẹ̌ e. I sire mapulu lighạgko mẹ̌mate.

¹⁷Sarangkate manụ u winalangeng e mal᷊ain tawe sumuẹ̌ su ral᷊ungu soma kụ nitaing su těngom matane,

¹⁸kaiso taumata ral᷊akisẹ̌ e katewe mundangu nẹ̌taingu sedẹ e waugu watangenge hala — kụ sedẹ e makasilakạ si sire.

¹⁹Kerene, taumata mẹ̌deạ biahẹ̌ kụ kai mẹ̌pakẹ u ětohe e sarungbe měmaehu niawane sẹ̌sane.

²⁰ Daringihẹ̌ko! Kapelesa e kụkui suapan dal᷊eng dingangu měmpamansagẹ̌ suapam piạ děllahe maral᷊oahẹ̌!

²¹I sie e mẹ̌kẹ̌kui suapan tukadu pasěllangeng e ringangu suapan tampạ marame:

²²”Ei taumata apang makakul᷊i! Sarang angerẹ ngae i kamene mang mapulu tatapẹ̌ kerene? Angerẹ tempone marěnta kụ i kamene měngědo wọu ta měngarẹ̌gang kasingkạ mase tawe měnarimạ u těntiro?

²³Daringihẹ̌ko siạ, kereu iạ e měněgu si kau, tangu waugi kau e takụ sarung pělahekangu ral᷊ohon naungku e ringangu takụ paněntiroěngu kasingkạku e.

²⁴I kamene e seng kinuiang, kaiso i kamene tawe měnarimạ, dingangu tawe mapulu mẹ̌pandung.

²⁵Kal᷊awọu sasasaku e tawe nisěmpikang i kamene ringangu těguku e tawe nitarimạ i kamene.

²⁶Ual᷊ingu ene, kereu i kamene masilakạ, iạ e sarung luměgeng kamene. Kereu i kamene měngkatakụ, iạ e sarung měheghesẹ̌ si kamene.

²⁷Ore, iạ e sarung měheghesẹ̌ si kamene kereu i kamene kawe kal᷊inso, ringangu nasigěsạ ual᷊ingu nikaěnsakengu silakạ kụ diměnta kere rěllang.

²⁸Su tempo ene i kamene sarung mẹ̌kui siạ, kai iạ e tawe sumimbang. I kamene e sarung mẹ̌deạ siạ walạewe suapa, kaiso tawe makapẹ̌sombangu iạ.

²⁹I kamene e mẹ̌sul᷊ungu taumata kụ tawẹ běke mapulu makareạ kasingkạ dingangu tawe tumatuhụ MAWU e.

³⁰I kamene e tawẹ běke mapulu měnarimạ u kal᷊awọu sasasaku arau mẹ̌pandung kal᷊awọu těguku.

³¹Ual᷊ingu ene i kamene e sarung makapěndang aị u manga kakanoạ u ringangu manga karakinu ral᷊akisẹ̌.

³²Taumata kụ tawẹ ěbạ e sarang mate ual᷊ingu tawe měngangarěgang iạ, dingangu taumata longong e sarung mahenẹ ual᷊ingu tawe mẹ̌papandung si siạ.

³³Arawe taumata kụ dụdaringihẹ̌ si siạ e sarung mapạdul᷊i. I sie mẹ̌biahẹ̌be mal᷊enehẹ̌ dingangu tawahal᷊uasu matakụ.”